Íbirigu hínsiñewatiña:

Ínchaha lumutiwa ínsiñeni le wasandirubei luagu Bungiu luma hawagu gürigia lun gaganbadi wamá lun gumadi le: “Heiba lubeiti habügürü gürigia ha lílana sun fulasu, adüga humaña nánime disipulugu; badisei humaña” (Mat. 28:​19, 20; Mar. 12:​28-31). Wéiriti lubafu ínsiñeni dan le tídangiñe lan sun wanigi warufudei. Gayaraati lánhingichunu hanigi gürigia “ha lúntiñabaña ibagari le magumuchaditi” (Adü. 13:48).

Lidan dan le sügühalibei, wéiriti meha wáfaagun lun wafurendeiruni le lunbei wariñaguni lidan apurichihani o lun wederegerun agumeiraguagüdüni houn gürigia. Ánheinti guentó, mégeitiwa wasubudiruni ida luba lan wayanuhan hama gürigia. Arufudatiwa ínsiñeni houn amu dan le wayanuhan hama luagu le uágubei habusenra gürigia hagía hayanuhan. Kei ámuñegueinarügü habéi gürigia hawariuagua, mosu aranseñu wamá lun wadügün asansiruni gabarounga waméi le áhüchüragüdübalin gürigia le úmabei wayanuha luma le hínsiñebei lun. Adügǘwatu garüdia to lun tíderaguniwa ibihei katei le!

Anihein 12 arufudahani tidan garüdia to ani ayanuhati kada aban lídangiñe luagu aban igaburi le wemegeirubei lun warufudun ínsiñeni luma lun wadügün disipulugu. Kada arufudahani le tídanbei, sagawati lídangiñe aban abahüdaguni tídangiñeti Bíbülia le ídanti larufudei Hesusu, o amu kristiánu le lánina furumiñeti sígulu, igaburi ligía lidan lani ministeriu. Mámaali wafurendeiruni le lunbei wariñaguni houn gürigia lidan apurichihani wáluaha, le wabusenrubei guentó, wafurendeiruni ida luba lan warufudun ínsiñeni houn gürigia. Lau sun mégeiwa lan sun burí igaburi le akutihóubei tidan garüdia to lidan wani ministeriu, harihubei anihein lan lídangiñe húutimati lun wagumeserun yanu hama gürigia, lun wagiribudun bisidaña luma dan le wíchugun aturiahani tídangiñeti Bíbülia houn.

Danme le haturiahani kada arufudahani, ráramagua humá asaminara luagun ida luba lan harufuduni igaburi ligía danme hapurichihan houn gürigia ha lídanbaña fulasu le ñein hubéi. Súdinitimati ínsiñeni le wasandirubei luagu Heowá luma hawagu gürigia sügǘ lau furumiñeguarügü ligaburi apurichihani. Ligíati, adüga huméi sun hiyaraati lun laganwoundun ínsiñeni le. Líderagubadün lira ibihei le habusenrubei: hadügün disipulugu.

Wéiriti wagundan lau lubuidun chansi le wámabei lánina weseriwidun úara huma sun awanha lan áhuduragua lúnrügü Heowá (Sof. 3:9). Agurabatiwa lun labiniruni Heowá áfaaguni le hadügübei lun hasigirun arufuda ínsiñeni lidan hadügǘn disipulugu!