Vanathu vo dhundeka:

Kuranda Txizimu ni vathu ti nga hi kuzeta ti to hi ‘tsula hi ya phindula vamatiko votshe ve maha vagondiswa . . . ni ku va bhabhatisa.’ (Mat. 28:19, 20; Marku 12:28-31) Lirando la ditshuri li ni mtamo. Li nga ndinda timbilu ta va va ku ni “fanelo ya wutomi wo mbi guma.”—Mith. 13:48.

Kale hi txi veka mapimo ko khumbulela siwuletiso ni ku ningela mabhuku. Kambe konku hi lava kutshukwatisa wusikoti wo bhula ni vathu. Hi lava kukombisa lirando ka vamwani ngu kuwomba-womba ati ti no va tsakisa. Eto ti womba kutiemisela ku tipfananisa ni txiemo ni kuwona ati ti tsakisako m’thu ni m’thu. Dibroxura diya di na hi vhunisa kutxani kumaha toneto?

Dibroxura diya di ni 12 wa tigondo ati ti kombisako ti hi fanelako ku timaha kasi kukombisa lirando ni kugondisa vathu. Gondo yimwani ni yimwani yi seketetwe ka ti Jesu mwendo mtxhumayeli mmwani wa kale va nga maha ka mthumo wo txhumayela. Hahanze ko khumbulela siwuletiso, hi lava kumana tinzila to kombisa lirando ka vathu. Mbimo yi hi gondako ngu timwani ni timwani ati ti lavekako ka mthumo wathu wo txhumayela, hi na wona to ngu tihi ati hi nga ti thumisako hi txi khata mabhulo, hi txi maha maendo o wuyela, mwendo hi txi tsimbitisa txigondo txa Bhiblia.

Mbimo yi u wonako gondo yimwani ni yimwani, pimisa ngu ti u nga ti mahako u txi womba-womba ni vathu va wukhalo wu u zumbako ka wona. Tikaratele kuengetela lirando lako ngu Jehovha ni vathu. Lirando lonelo, li na kuvhuna kuhokelela makungo ako o maha vagondiswa.

Phela i lungelo ya hombe ngutu kuthuma kumweko ni nawe. (Zef. 3:9) Hi navela to Jehovha e ku katekisa mbimo yi u simamako u kombisa lirando ka vathu ni ku va gondisa!