Dawtmi Unau Hna:

Pathian le mi pawl kan dawt hnanak nih ‘miphun vialte sinah kal in zultu an si nakhnga va cawnpiak hna awk le tipilnak va pek hna’ awkah a kan forh. (Matt. 28:19, 20; Marka 12:28-31) Mahzawn ruat lo dawtnak cu a ṭhawng tuk. Mah nih “zungzal nunnak hmuh ding ah thim a simi hna” kha an lung a suk khawh hna.—Lam. 13:48.

Hlan ahcun chim ningcang i baihat le cauk pek kha biapi ah kan rak chiah. Atu cu biaruah ning ah kan ṭhancho nakhnga kan i zuam a hau. Midang kan dawt hna kha hngalh an duhmi kong kan chimh hnanak thawng in langhter kan duh. Mah cu a tlarimi si, pakhat cio i an lungretheihnak le hngalh an duhmi kong kha ṭha tein ruah kha a chim duhmi a si. Cutin tuah awkah mah brochure nih zeitindah a kan bawmh lai?

Mah brochure ah cawn dingmi 12 a um i mah ah mi cung ah dawtnak langhter awk le zultu siter awkah kan ṭhancho a herhmi sining kong kha a langhter. Cawn dingmi pakhat cio cu Jesuh asiloah kumzabu pakhatnak i Khrihfa hna nih phungchim rianṭuannak ah an rak langhtermi sining kong aa ṭialnak Baibal ah hrambunhmi a si. Aa tinhnak cu chim ningcang baihat kha si loin mi cung ah dawtnak langhter khawh ning lam kawl kha a si. Sining pakhat cio cu kan phungchim rianṭuannak dihlak caah a herhmi an si. Asinain bia kan i ruah tik, lennolh kan kal tik asiloah Baibal cawnpiaknak kan tuah tikah a hleiin zei sining dah a herh timi kong kha kan i ruah hna lai.

Cawn dingmi pakhat cio na hlathlai lioah, mi he bia nan i ruah tikah mah sining langhter khawh ning kong kha ṭha tein ruat. Jehovah le mi pawl cung ah dawtnak fehter awkah i zuam. Mah dawtnak nih a dang zei bantuk lam nakhmanh in mi pawl zultu siter awk timi na hmuitinh phanh awkah aan bawmh khawh deuh.

Nanmah he lungkhat tein rianṭuanṭinak tinvo sung kan hmuh caah kan i lawm tuk. (Zef. 3:9) Mi pawl dawt awk le zultu siter awkah nan i zuam pengnak cung ah Jehovah nih thluachuah tampi in pe ko hna seh.