Ser frer ek ser:

Lanmour pour Bondye e pour lezot i motiv nou pour “al kot bann dimoun dan tou nasyon e fer zot vin . . . disip, batiz zot.” (Mat. 28:​19, 20; Mark 12:​28-31) Si nou annan lanmour senser pour lezot, nou kapab ed bann ki annan sa “bon kondisyon leker pour ganny lavi eternel.”—Akt 13:48.

Dan lepase, nou ti konsantre lo aprann bann prezantasyon par ker e kit en piblikasyon. Aprezan, nou bezwen travay pour amelyor nou abilite pour fer konversasyon avek bann dimoun. Nou anvi demontre lanmour pour lezot ler nou koz avek zot lo bann topik ki enteres zot. Sa i vedir ki nou bezwen pare pour adapte e pran an konsiderasyon lentere sak dimoun. Ki mannyer sa brosir i kapab ed nou fer sa?

Sa brosir i annan 12 leson ki ansenny nou bann kalite ki nou bezwen devlope, pour nou kapab demontre lanmour e pour fer dimoun vin disip. Sak leson i baze lo en resi Labib ki konsantre lo en kalite ki Zezi oubyen bann Kretyen dan premye syek ti demontre dan predikasyon. Nou lobzektif se pa pour aprann bann prezantasyon par ker me pour rod fason pour demontre nou lanmour pour bann dimoun. Menm si nou bezwen sak sa bann kalite dan predikasyon, nou pou vwar serten kalite ki nou bezwen pour konmans bann konversasyon, pour swiv zot lentere oubyen pour fer bann letid Labib.

Anmezir ou lir sak leson, mazin byen ki mannyer ou kapab demontre sa kalite ler ou pe koz avek dimoun dan ou teritwar. Esey demontre plis lanmour pour Zeova e pour bann dimoun. Sa lanmour pou ed nou atenn nou lobzektif pour fer dimoun vin disip, plis ki okenn lezot metod.

Nou apresye sa gran privilez pour travay ansanm avek ou dan linite. (Zef. 3:9) Ki Zeova i beni ou en kantite, anmezir ou kontinyen demontre lanmour pour bann dimoun e fer zot vin disip!