Cʼuxbibil bʌ hermanojob:

Jiñi laj cʼuxbiya ti Dios yicʼot ti lac piʼʌlob miʼ ñijcañonla lac jacʼ jiñi mandar muʼ bʌ i yʌl: «Cucula i sutqʼuinla ti xcʌntʼan jiñi quixtañujob tiʼ pejtelel tejclum. Aqʼueñobla chʼʌmjaʼ» (Mat. 28:19, 20; Mar. 12:28-31). Jiñi i sujm bʌ cʼuxbiya an i pʼʌtʌlel. Miʼ mejlel ti cʼotel tiʼ pusicʼal jiñi lac piʼʌlob yomoʼ bʌ «i taj jiñi cuxtʌlel mach bʌ añic miʼ jilel» (Hech. 13:48).

Ti wajali tsaʼ lac chaʼle wersa chaʼan mi laj cʌy ti lac jol jiñi presentación tac yicʼot chaʼan mi la cʌcʼ jun tac. Pero wʌle yom mi lac ñumen cʌn bajcheʼ miʼ mejlel lac tech tʼan. Cheʼ mi lac chʼʌm ti ñuc chuqui miʼ ñaʼtan jiñi lac piʼʌlob woli lac pʌsbeñob laj cʼuxbiya. Mach junlajaloñicla, jin chaʼan yom mi lac ñaʼtan chuqui miʼ mulan o chuqui miʼ pensarin jiñi lac piʼʌlob. ¡Ili jun melbil chaʼan miʼ coltañonla lac mel jiñi!

Ili folleto an i chaʼan 12 lección muʼ bʌ i taj ti tʼan 12 yom bʌ an lac chaʼan chaʼan mi lac pʌs cʼuxbiya yicʼot chaʼan mi lac sutqʼuin ti xcʌntʼan yañoʼ bʌ. Jujumpʼejl lección miʼ taj ti tʼan jumpʼejl relato muʼ bʌ i pʌs chaʼan Jesús o juntiquil xñoptʼan ti ñaxam bʌ siglo tsiʼ pʌsʌ jumpʼejl melbalʌl tiʼ subtʼan. La com bʌ ili ora jiñʌch chaʼan mi lac pʌsben cʼuxbiya lac piʼʌlob, i mach jiñic jach chaʼan mi laj cʌy ti lac jol jiñi presentación. Anquese pejtelel muʼ bʌ i taj ti tʼan ili folleto i cʼʌjñibal lac chaʼan ti subtʼan, mi caj a qʼuel chaʼan an ñumen ñuc tac bʌ i cʼʌjñibal cheʼ bʌ mi lac tech tʼan, cheʼ bʌ mi lac mel revisita yicʼot cheʼ bʌ mi la cʌcʼ estudio.

Cheʼ bʌ maʼ qʼuel majlel jujumpʼejl lección, wen ñaʼtan bajcheʼ miʼ mejlel a pʌs jujunchajp muʼ bʌ i yʌjlel yaʼi cheʼ bʌ maʼ suben wen tʼan jiñi lac piʼʌlob yaʼ baqui chumulet. Jiñi ñumen ñuc bʌ i cʼʌjñibal jiñʌch laj cʼuxbiya tiʼ tojlel Jehová yicʼot tiʼ tojlel lac piʼʌlob, i mach jiñic bajcheʼ mi lac chaʼlen subtʼan. Jin chaʼan, chaʼlen wersa chaʼan maʼ ñumen pʼʌtʼesan jiñi a cʼuxbiya. Ili mi caj i coltañet chaʼan maʼ sutqʼuin ti xcʌntʼan yañoʼ bʌ.

Mic wen qʼueleʼ lojon ti ñuc cheʼ mi laj comol chaʼlen eʼtel (Sof. 3:9). ¡Laʼ i yʌqʼueñetla i bendición Jehová come woli laʼ chʌn chaʼlen wersa chaʼan mi laʼ sutqʼuin ti xcʌntʼan yañoʼ bʌ!