Koi itre ka cainöjëne la Baselaia:

Ame la ka uku së “troa . . . inine la itre atr me bapataiso angatr,” ke hnene la ihnim, ihnimi së koi Akötresie me koi itre atr. (Mat. 28:19, 20; Mar. 12:28-31) Ka nyipiewekë catr la ihnim. Ej a ketr la hni ne la itre atr ka “hmalahnine troa kapa la mele ka pë pun.”​—It. Hu. 13:48.

Ame e cili lo, hne së hna majemine qaja la mekun, me hamëne la itre itus hne së hna hnëkën. Ngo ame hë enehila, easë hë a troa porotrik memine la itre atr. Ame la easa porotrikëne la itre mekun hnei angatr hna ajan, aqane tro hi së lai a amamane ka hape, easa hnimi angatr. Matre nyipiewekë catr tro easa drenge hnyawa la hnei angatr hna ajane troa porotrikën. Nge tro la itusi celë a xatua së.

Tro la 12 lao ini ngöne la boroshür celë, a amamane la itre thiina nyine tro la itre atr a öhne ka hape, easa hnimi angatr, me ajane tro angatr a hane xötrethenge Iesu. Itre ej asë hi a nyiqane hnene la ketre thiina hna amaman hnei Iesu, maine hnene la ketre ka cainöj ekö ngöne la hneijine i nyidrë. Tha nyipiewekë kö tro easa inine gufane la nyine tro sa qaja, ke ame la ka nyipiewekë ke, ihnimi së kowe la itre atr. Ka nyipiewekë asë hi la itre thiina cili ngöne la hna cainöj. Ngo ame la itre xaa thiina, ke sisitria kö troa huliwan ngöne la easa nyiqane ithanata, iwai hmaca, maine hamë ini.

Ame la easa ase wange la ketre ini, easa pane mekune la aqane tro sa huliwane lai thiina ngöne la easa porotrik. Akökötrene jë la ihnimi eö koi Iehova, memine la itre atr ka lapa easenyi eö, ke ame la ka nyipiewekë ke ihnim, nge celë hi ka troa xatua eö troa eatrëne la aja i eö, troa inine la itre atr troa xötrethenge Iesu.

Madrine hun troa ce nyihlue i Iehova me eö hnene la hni ka cas. (Zefa. 3:9) Epi tro Akötresie a amanathithine la aja, me trengecatre i eö troa hnime la itre atr, me ini angatr troa xötrethenge Iesu!