A bonasango na bonańango ba ndolo:

Ndolo ońola Loba na bato e matute̱le̱ biso̱ o londise̱ ben byala ná: “Bińo̱ ala . . . timbise̱ matumba me̱se̱ bokwedi bam, lo dubise̱ babo̱.” (Mat. 28:​19, 20; Marko 12:​28-31) Ndol’a mbale̱ ńe ngińa. Ńe ná e tapa milema ma ba bena be o bete̱medi ba mudī be mapule̱ ońola longe̱ la bwindea.​—Bebolo 13:48.

O kwaṅ, di ta nde di we̱ ná di kombe̱ byingedi b’ekwali o mulopo na die̱le̱ pe̱ bato kalati. Tatan jangame̱n nde we̱ ná jokwe kwala na bato. Di malee̱ ná di to̱ndi bato ke̱ di makwalea ońola mambo ma malondise̱ mpuli mabu. Nika e mapula kwala ná jangame̱n be̱ bo̱tibo̱ti, na jombwea pe̱ mitakisan na mpuli ma moto te̱. Ne̱ni nin kalati nisadi ńeno̱ ná ńongwane̱ biso̱ o bola nika e?

Nin kalati nisadi e be̱n 12 belēdi bena be malee̱ biso̱ bede̱mo jangame̱nno̱ sa ná di lee̱le̱ bato ndolo na timbise̱ pe̱ babo̱ bokwedi. Belēdi te̱ be makwalea ońola ede̱mo ewo̱ yena Yesu, to̱ kriste̱n a boso i lee̱le̱no̱ o ebol’a dikalo. Nje ye biso̱ mweńa e titi ná di kombe̱ byingedi b’ekwali o mulopo, nde ná di wase ne̱ni lee̱le̱ bato ndolo. To̱ná ede̱mo te̱ yeno̱ mweńa o ebol’asu ya dikalo, o nin kalati, di me̱nde̱ jombwea bede̱mo bō̱ ba tobotobo be mapule̱ biso̱ o botea ekwali, o po̱ngo̱ mape̱pe̱le̱, to̱ o tombise̱ mokwa ma Bibe̱l.

Niponda weno̱ o jombwea belēdi te̱, dutea ne̱ni weno̱ ná o lee̱le̱ y’ede̱mo ke̱ o makwalisane̱ bato ba mōnda mo̱ngo̱ ma dikalo. We̱ na ngińa ná o bate to̱ndo̱ Yehova na bato. Ni ndolo ńena ni buki to̱ njika mbad’a no̱ngea l’ekwali to̱ ńa tombise̱ jokwa, nde e me̱nde̱ jongwane̱ wa ná o tongwe̱le̱ o timbise̱ bato bokwedi.

Nika ńe biso̱ edube ende̱ne̱ o bola ebolo mwemba na bińo̱. (Sef. 3:9) Yehova a namse̱ bińo̱ njoasoa, ná lo mabengano̱ to̱ndo̱ bato na timbise̱ pe̱ babo̱ bokwedi!