Raveitacini:

Na noda lomana na Kalou kei ira na tamata e uqeti keda meda ‘lako meda vakavulici ira na lewe ni veivanua kece ga mera tisaipeli qai papitaisotaki ira.’ (Maciu 28:19, 20; Mari. 12:28-31) Na loloma qori e kaukaua. E rawa ni uqeta na lomadra na “yalomalumalumu era muria na sala mera bula tawamudu.”—Caka. 13:48.

Ena gauna sa oti, eda dau kauaitaka ga na muri ni vakatutu, kei na soli ivola, ia ena gauna qo eda sa uqeti meda vakavinakataka na iwalewale ni noda veivosaki. Eda vakaraitaka qori nida lomani ira eso tale nida veivosakitaka na ulutaga era kauaitaka yadudua. Kena ibalebale eda na yalorawarawa qai vakasamataka vinaka na ka era kauai kina. Ena vukei keda gona vakacava na brochure qo?

Na brochure qo e tiko kina e 12 na lesoni eda vulica kina na itovo e bibi meda bucina, me rawa nida vakaraitaka na loloma qai vakavulici ira mera tisaipeli. Na lesoni yadua e yavutaki ena italanoa vakaivolatabu, e vakaraitaka kina o Jisu se dua na daukaulotu ena imatai ni senitiuri na itovo e bibi ena cakacaka vakaitalatala. Na kena inaki, mo kua ni cavuqaqataka na vakatutu, ia mo qara na sala mo vakaraitaka kina nomu lomani ira na lewenivanua. E yaga na itovo kece qori ena noda cakacaka vakaitalatala, ia eda na dikeva ni so na itovo ena yaga sara vakalevu nida tekivutaka na veivosaki, veisikovi lesu, se vuli iVolatabu.

Ni o vulica tiko na lesoni yadua, vakasamataka na sala o na bulataka kina na itovo qori vei ira ena nomu itikotiko. Saga mo vaqaqacotaka tiko ga nomu lomani Jiova kei ira na tamata. Na loloma qori ena vukei iko mo rawata nomu isausau mo vukea eso mera tisaipeli.

Keitou marautaka na noda rawa ni cakacaka vata ena duavata. (Sefa. 3:9) Me vakalougatataki kemuni mada ga o Jiova, ena nomuni lomani ira tiko ga na tamata qai vukei ira mera tisaipeli!