Nɔví súnnu kpó nɔví nyɔ̌nu kpó vívɛ́ lɛ́ mi:

Wǎnyíyí e mǐ ɖó nú Mawu kpó gbɛtɔ́ lɛ́ kpó é nɔ sísɛ́ mǐ bɔ mǐ nɔ “yi, bo [nɔ] bló bónú mɛ lɛ́ ní húzú ahwanvú ɖo akɔta lɛ́ bǐ mɛ, lobo [nɔ] bló batɛ́mu nú yě.” (Mat. 28:19, 20; Mak. 12:28-31) Wǎnyíyí e ma ɖó cejɛ́nnábí ǎ é ɖó hlɔ̌nhlɔ́n. É sixú byɔ́ ayi mɛ nú mɛ ɖěɖěe ɖó “ninɔmɛ ayi mɛ tɔn e sɔgbe bo ná dó sixú mɔ gbɛ mavɔmavɔ lɛ́ é.”—Mɛ. 13:48.

Ð’ayǐ ɔ, mǐ nɔ sɔ́ ayi ɖó nǔxwlémɛ lɛ́ hinhɛn tamɛ kpó wěma lɛ́ jíjódó nú mɛ lɛ́ kpó jí. Din ɔ, mǐ ɖó ná tɛ́n kpɔ́n bɔ nǔwúkpíkpé e mǐ ɖó bo nɔ ɖɔ xó ɖó kpɔ́ xá mɛ lɛ́ é ná kpɔ́n te d’é jí. Mǐ jló ná xlɛ́ mɛ ɖěvo lɛ́ ɖɔ mǐ yí wǎn nú yě gbɔn xó ɖiɖɔ dó xóta e nɔ dɔn yě lɛ́ é jí gblamɛ. Énɛ́ byɔ́ ɖɔ mǐ ní nɔ húzú alɔ bo nɔ lɛ́ lin tamɛ dó nǔ e nɔ ɖu ayi mɛ nú mɛ ɖokpó ɖokpó bo nɔ lɛ́ dɔn yě lɛ́ é jí. Nɛ̌ alɔnuwéma élɔ́ ka sixú d’alɔ mǐ ɖo ali énɛ́ nu gbɔn?

Nǔkplɔ́nkplɔ́n 12 wɛ ɖo alɔnuwéma ɔ mɛ; yě xlɛ́ jijɔ e mǐ ɖó ná tɛ́n kpɔ́n bo ɖó bá dó xlɛ́ mɛ lɛ́ ɖɔ mǐ yí wǎn nú yě, bo ná lɛ́ d’alɔ yě bɔ yě ná húzú ahwanvú é. Nǔkplɔ́nkplɔ́n ɖokpó ɖokpó jínjɔ́n tan Biblu tɔn e ɖɔ xó dó jijɔ e Jezu alǒ wɛnɖagbejlátɔ́ xwe kanweko nukɔntɔn ɔ tɔn ɖěvo ɖe xlɛ́ ɖo sinsɛnzɔ́ ɔ mɛ é jí. È ná kplɔ́n nǔxwlémɛ lɛ́ dó tamɛ wɛ nyí nǔ e gbé nya wɛ mǐ ɖe é ǎ, loɔ, mǐ ná ba ali ɖěɖěe nu mǐ ná xlɛ́ mɛ lɛ́ ɖɔ mǐ yí wǎn nú yě ɖe lɛ́ é. Nǔgbó wɛ ɖɔ jijɔ lɛ́ bǐ sín hudó wɛ mǐ ɖó ɖo sinsɛnzɔ́ mǐtɔn sín akpáxwé lɛ́ bǐ mɛ, amɔ̌, mǐ ná ɖɔ xó dó lěe mǐ ɖó hudó jijɔ ɖé lɛ́ tɔn tawun hwenu e mǐ ná bɛ́ xóɖɔɖókpɔ́ lɛ́, ba mɛ lɛ́ kpɔ́n alǒ kpé nukún dó Biblu kplɔ́nkplɔ́n lɛ́ wú gbɔn é jí.

Ée a ná ɖo nǔkplɔ́nkplɔ́n ɖokpó ɖokpó gbéjé kpɔ́n wɛ é ɔ, lin tamɛ dó lěe a sixú ɖe jijɔ ɔ xlɛ́ hwenu e a ná ɖo xó ɖɔ xá mɛ lɛ́ wɛ ɖo xá towe mɛ é gbɔn é jí. Dǒ gǎn bónú wǎnyíyí e a ɖó nú Jexóva kpó gbɛtɔ́ lɛ́ kpó é ní jɛjí. Wǎnyíyí énɛ́ ná d’alɔ we hú wlɛnwín ɖěbǔ e a ná zán é, bɔ a ná kpé wú bo d’alɔ mɛ lɛ́ bɔ yě ná húzú ahwanvú.

Wǔjɔmɛ ɖaxó e mǐ ɖó bo nɔ w’azɔ̌ xá we alɔ ɖo alɔ mɛ é su nukún mǐtɔn mɛ. (Sof. 3:9) Jexóva ní bo kɔn nyɔ̌ná dó jǐ we flaflá tɔn hwenu e a ná kpo ɖo wǎn yí nú mɛ lɛ́ wɛ bo ná ɖo alɔ dó yě wɛ bónú yě ná húzú ahwanvú é!