Frè é sè an nou,

Sé lanmou pou Bondyé é pou pwochen an nou, ki ka pousé-nou ‘alé é fè disip pawmi moun a tout kalté nasyon é batizé-yo’ (Mat. 28:19, 20 ; Mawk 12:28-31). Lanmou sé on fòs ki puisan toubòlman. Sé grasa-y, nou pé touché tchè a ‘tout moun ki ni mantalité-la ki fo la pou ni lavi étèwnèl’ (Akt 13:48).

Avan, pli souvan ki rarman, nou té ka chèché aprann on prézantasyon pa tchè é lésé on piblikasyon ba sé moun-la. Alèla, sa nou vlé, sé vin pi filé pou ni dé bon ti kozé èvè yo. Nou ka montré kè nou enmé sé moun-la lè nou ka palé dè biten ki ka entérésé-yo. Pou rivé fè sa, fò nou kapab adapté-nou é tchenn kont dè sitiyasyon a chakmoun. Sé ègzaktèman sa bwochi-lasa ké édé-nou fè.

Bwochi-la ni 12 lèson. Chak lèson ka palé dè on kalité diféran. Si nou ni sé kalité-lasa, nou ké montré sé moun-la kè nou enmé-yo, é nou anvi kè yo osi yo vin disip a Jézi. Chak lèson bazé asi on istwa adan Labib, ki ka fè-nou vwè kijan Jézi, oben ondòt prédikatè o prèmyé syèk, montré i té ni kalité-lasa. Òbjèktif-la, a pa aprann on prézantasyon pa tchè, men sé konprann kijan nou pé montré pibyen kè nou enmé pwochen an nou. Sé vré, lè nou ka préché, nou bizwen sé 12 kalité-lasa toutlè. Kanmenmsa, nou ké vwè kijan déotwa adan sé kalité-lasa pi itil, lè nou ka koumansé on ti kozé, lè nou ka viré palé èvè on moun é lè nou ka fè on étid biblik.

Chakfwa ou ka étidyé on lèson, pran tan réfléchi byen asi jan pou ou montré kalité-lasa, lè ou ka palé èvè sé moun-la koté-la ou ka rété la. Fè bon éfò pou lanmou a-w pou Jéova é pou pwochen a-w vin pli solid. Pétèt kò a-w bon adan kèk domèn, men sonjé, sé lanmou ki ké édé-w rivé an bout a òbjèktif a-w : fè disip.

Nou fyèw davwa nou ka sèvi Jéova « ansanm-ansanm » èvè zòt (Sof. 3:9). Nou ka mandé-y béni-zòt toupannan zò ka kontinyé aji èvè lanmou é fè disip !