Frè é sè,

Sa ki ka pousé nou ‘alé touvé sé moun-lan pou yo vini disip Jézi épi pran batenm’, sé lanmou. Lanmou pou Bondié épi pou pwochen-nou (Mat. 28:19, 20 ; Mak 12:28-31). Lanmou sé an bagay ki fò toubannman. I ka touché tjè moun ki ni « léta lèspri-a ki fo pou ni lavi étèrnèl » (Akt 13:48).

An tan-an, nou té ka aprann pa tjè an prézantasion épi nou té ka kité piblikasion ba sé moun-lan. Jòdi-a, sa ki pli enpòwtan sé ni bokantaj-pawòl épi sé moun-lan. Lè nou ka palé épi yo anlè bagay ki ka entérésé yo poubon, sé an manniè pou nou montré yo nou enmen yo. Pou rivé fè sa, fòk nou adapté kònou épi chak moun-lan. É sé sa menm bwochi-tala kèy endé nou fè.

Bwochi-tala ni 12 lison. Chak lison ka mété douvan an kalité ki kèy montré sé moun-lan nou enmen yo, é nou sé lé yo vini yo osi disip Jézikri. Yo chak la ka détayé an listwa biblik éti Jézi ouben an prédikatè 1^ié sièk-la ka montré nou ki manniè pou ni kalité-tala. Nou pa lé aprann pa tjè an prézantasion. Sa nou lé, sé konprann ki manniè nou pé montré plimié pwochen-nou nou enmen’y. Asiré sé 12 kalité-tala itil toupatou adan ministè-a, men nou ké wè yonn-dé adan èspésialman itil pou koumansé an ti-kozé, pou kontinié an ti-kozé ouben fè an létid biblik.

Adan chak lison, bien katjilé anlè ki manniè pawòl-ou ka montré ou ka travay kalité-a ou étidié. An prèmié, chèché fè lanmou’w ba Jéova épi ba lé moun-lan vini pli fò. Pas, sé lanmou, plis ki nenpòt bagay ou sa fè, ki kèy endé’w fè disip.

Nou fiè sèvi Jéova « kantékant » épi’w (Sof. 3:9). Nou ka priyé Bondié pou i béni’w pas ou ka fè éfò pou montré sé moun-lan ou enmen yo épi pou fè disip !