Nakoia Taari:

Ti kairaki n tangiran te Atua ao aomata bwa ti na ‘nako n reireinia aomata mai buakoia botannaomata nako bwa a na riki bwa taan rimwini Kristo ao ni bwabetitoiia.’ (Mat. 28:19, 20; Mareko 12:28-31) E rangi ni korakora te tangira ae aki bangaomata. E kona n ringi nanoia naake a “tauraoi nanoia ni butimwaea te koaua ae kairiia nakon te maiu are aki toki.”​—Mwa. 13:48.

N taai aika nako ao ti kakaraoi riki maroro aika kamatenikunaaki ao katukan taiani maekatin. N te tai aei, ti nang riai ni karikirakea mwaataira ni maroro. Ti kani kaotiota tangiraia tabemwaang n arora ni maroroakini baika kakaongora irouia. E nanonaki n anne te kona ni kaangaraoira ao iaiangoan raoi tabeaiangan te aomata ao te bae kan ongora iai. E na kangaa te boroutia aei ni buokira ni karaoa anne?

Iai 12 te reirei i nanon te boroutia aei, ao e kaotii aroaro aika ti riai ni karikirakei, bwa ti aonga ni kaotiota te tangira ao ni karekeia taan rimwini Kristo. A boto reirei aikai i aon te rongorongo man te Baibara, ae rongorongon Iesu ke temanna te tia tataekina te euangkerio n te moan tienture, ae e kaotiota te aroaro teuana n ana mwakuri ni minita. Tiara bwa ti na aki kamatenikuna ara maroro, ma ti na ukeri aanga ake ti na kaotiota iai tangiraia aomata. E ngae ngke a bane aroaro aikai ni kainnanoaki n iteran nako te mwakuri ni minita, ma ti na nori aroaro tabeua aika kainnanoaki riki ni moanakin te maroro, n te manga oki, ke ni kairan te reirei n te Baibara.

Ngkana ko rinanon te reirei teuana ma teuana, iangoia raoi bwa ko na kangaa ni kaotiota te aroaro anne ngkana ko maroro ma aomata aika n am aono. Kataia kakorakoraa tangiran Iehova ao aomata iroum. Bwa e ngae ngkana iai rabakaum ae onoti ma bon te tangira anne ae e na buokiko n roko n tiam ae karekeaia taan rimwini Kristo.

Ti kakaitau n te kakabwaia ae rianako, ae ti katiteuanaaki ni mwakuri ma ngkoe. (Teb. 3:9) E bia kabatiaa kakabwaiaam Iehova ngkai ko teimatoa ni kaotiota tangiraia aomata ao ni karekeia taan rimwini Kristo!