Pá Vígà Págbálà Nè Pábia:

Vulè e íè kilma ló Bàrì nè gbò nen ólò naa kọ é àà ‘gé naa kọọ̀ gbò nen e bà aa dénè dó á nyoone nvéè Kráìst, vaá tú va diilé múú.’ (Máát. 28:​19, 20; Máàk 12:​28-31) Vulè e bè náa dú kùlù-kúlù palàge ié kpóó. Be è íe íb vulèí kilma ló gbò nen, àé láá nvèè bá nè ‘gbò e bà íe tàn’ kọ bàá dù gé nyimá ló Bàrì.​—Tóm 13:48.

Tṍó ea kil nvéeá, e beè olòó bọọgẹ̀ ká bùlà gbẹẹ́ boo gè noo nú eé kọ́ sẹ̀ẹ̀a bùlà tṍó e gé kọ́ kpẹ̀a nè ge nè kpá. Kátogóí, à dú bíi kọ é sìm kilsĩ́ mm̀ bẹẹ kalì ge zọ̀ọ̀mà nen loá sọ́l. È gbĩ́ gè zogè kọ è vulè gbò nen tení dú ló gè ló bel boo gbò togó bel ea léémá va. Níí tõó dọ̀ kọọ̀ èé ọ́ẹ̀ dẽe vaá di kpènà ló gè nyaaná bá ló bẹẹ kọ̀ kpẹ̀a dẹ̀ẹ̀a boo bíi nè nú ea léémá buù nen. Mósĩ́ deè ní e bróshọ̀í é nveè bá nèi kọ é láá naa vóé?

Nakà bróshọ̀í íe 12 nu gè nò, ea nóòmài gbò kpãa e íè bíi ló kọbé è láá ié vulè kilma ló gbò nen vaá naa kọ bàá nyoone nvéè Kráìst. Buù kà nu gè nòí dẹẹ̀a boo nòòtẽ́ ea di mm̀ Kpá Káí, ea kọ́ gbò kpãa e Jíízọ̀s àbèè dõona kà gbò kọ̀ kpẹ̀a e ba beè di mm̀ túá gbò gbááá beè ié tṍó e bà géè kọ́ kpẹ̀a. Bẹẹ nu sẹ̀ẹ̀a sĩ́ níì ge noo nú eé kọ́ tṍó e gé kọ́ kpẹ̀a nì, sõò ge gbĩ́ gbò sĩ́deè eé láá zogè kọ è vulè gbò nen. Náa kal ló béè kọọ̀ buù kà gáí dú bíi mm̀ dénè bá gè kọọmá kpẹ̀a, èé ló bel boo bé e buù kà gáí palàge dú bíi naa tṍó e gé daamà togó loa sọ́l, òòà sì gé kãa nen, àbèè ge noòmà Kpá Káí nen.

Boo tṍó eo gé nó buù kpòí, palàge bugi togó boo bé eo é láá tú kpãaí siimá tóm naa tṍó eo gé ló bel nè gbò e bà di kĩée eo ólò tõo. Pììga boo gè agẹlẹ ló vulè eo íè kilma ló Jìhóvà nè gbò nen. Vulèá ní ea é palàge nvèè bá nè ni kọ ó teá tùlà o nu sẹ̀ẹ̀a sĩ́, ea dú gè naa kọọ̀ gbò nen á nyoone nvéè Kráìst e.

Nyíéi palàge ẹẹ ló nèà deè e íè ge zọ̀ ni siá tóm mm̀ bá nè bá. (Zèf. 3:9) Jìhóvà á palàge tãanè ni dee bá boo tṍó eo gé kilsĩ́ gè vùlè gbò nen vaá naa kọ bàá nyoone nvéè Kráìst!