Wekanhlanmẹ de sọn Hagbẹ Anademẹtọ lọ Dè
Mẹmẹsunnu po Mẹmẹyọnnu Vivẹ́ lẹ po Emi:
Owanyi he mí tindo na Jiwheyẹwhe podọ na gbẹtọ lẹ nọ whàn mí nado “yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé.” (Mat. 28:19, 20; Malku 12:28-31) Owanyi matin ṣejannabi dohuhlọn taun. E gán yinuwado mẹhe “tindo ninọmẹ ahun mẹ tọn he jẹna ogbẹ̀ madopodo” lẹ ji sisosiso.—Owalọ 13:48.
To dai, mí nọ tẹnpọn nado plọn nuzedonukọnnamẹ mítọn lẹ do tamẹ bo do owe lẹ gbonu. Amọ́ todin, e biọ dọ mí ni nọ dovivẹnu nado hẹn aliho he mẹ mí nọ dọhodopọ hẹ mẹdevo lẹ te pọnte dogọ. Mí nọ jlo na do owanyi hia mẹdevo lẹ gbọn hodidọ do hosọ he nọ fọnjlodotena yé lẹ ji dali. Ehe zẹẹmẹdo dọ mí dona nọ diọalọ bo nọ yí sọwhiwhe do lẹnnupọndo ahunmẹdunamẹnu mẹdopodopo tọn po nuhe mẹ e nọ do ojlo te po ji. Nawẹ alọnuwe ehe na gọalọna mí nado wà enẹ gbọn?
Alọnuwe lọ bẹ nupinplọn 12 hẹn he do jẹhẹnu voovo delẹ hia ehe e na biọ dọ mí ni wleawuna nado sọgan nọ do owanyi hia gbẹtọ lẹ bo hẹn yé zun devi lẹ. Nupinplọn dopodopo nọ sinai do kandai Biblu tọn de ji, he mẹ Jesu kavi wẹndagbe-jlatọ owhe kanweko tintan whenu tọn devo de do jẹhẹnu tangan de hia te. Yanwle lọ ma yin nado plọn nuzedonukọnnamẹ lẹ do tamẹ gba, amọ́ nado nọ dín aliho voovo lẹ he mẹ mí na dohia gbẹtọ lẹ te dọ mí yiwanna yé. Dile etlẹ yindọ mí do hudo jẹhẹnu lọ lẹ dopodopo tọn to adà lizọnyizọn mítọn tọn lẹpo mẹ, mí na gbadopọnna lehe delẹ to jẹhẹnu enẹlẹ mẹ yin nujọnu do, titengbe to whenue mí jlo na bẹ hodọdopọ de jẹeji, to gọyìpọn de whenu kavi whenue mí to anadena plọnmẹ Biblu lẹ.
Dile a to dogbapọnna nupinplọn dopodopo, yiagbọji bo lẹnnupọndo lehe a gán nọ do jẹhẹnu lọ hia to whenue a to hodọna gbẹtọ lẹ to lẹdo towe mẹ do ji. Dovivẹnu nado hẹn owanyi towe na Jehovah podọ na gbẹtọ lẹ sinyẹn deji. Owanyi enẹ na gọalọna we nado jẹ yanwle towe nado hẹn gbẹtọ lẹ zun devi lẹ kọ̀n hugan aliho mẹpinplọn tọn devo depope.
Mí yọ́n pinpẹn lẹblanulọkẹyi daho he mí tindo nado to azọ́nwa hẹ mì abọ́ to abọ́ go tọn. (Zef. 3:9) Na Jehovah ni dona mì susugege dile mì zindonukọn nado to wanyina gbẹtọ lẹ bo to yé hẹn zun devi lẹ!
Mẹmẹsunnu mìtọn lẹ,
Hagbẹ Anademẹtọ Kunnudetọ Jehovah Tọn lẹ Tọn
