ˈDhoudhi -ɲmai -e ˈdhoudhi -ɲnʋnkpaeˈ:

Ɲɔnsoa aˈ dɩkman- -e ɲʋn anˈ dɩkman- an ˈˈtun -aʋ ˈmɛn -aa yea ‘ɲʋn nɩan ˈbhlʋɩ aˈ klɛɛ ˈdhii bho i mun [ . . . ] -aa yea dhɛcɩaʋn nʋn, -aa yʋbʋ ˈˈnin ˈzɔn jhaa.’ (Mat. 28:​19, 20; Marc 12:​28-31) Ɲʋndɩkman- -ɛɛˈ zia ɛɛˈ ˈˈjɛ ɛˈ dɩ ˈbhleɛ ˈˈɩkman-. Ɛ ˈbhɛɛˈ ɛ ˈye ɲʋn -ʋʋ nɩan “ˈkmʋn sea ˈˈtianˈ ˈbhle ɛˈ ka” aˈ -pɛɛ i ˈtʋn.—Actes 13:48.

-Tɛnˈˈ -dhe ɛ, dhɛtosʋn anˈ ˈˈdhru ˈdhii ˈbhleeɛ- -e ɲʋn ˈsɛɩ ˈˈjhrii -gbleɛ- -mɛn -aa kpʋn ˈe ˈˈjhri -dhe. -Kaan bhla, ɛ -kɔn dɩ -a ˈye -ka -aa nʋan ˈe ɲʋn bho -ghwlu sʋn ˈkpa po. -Bho -a -nɩn ɲʋn an sa ghwlu ɛˈ, -aa ˈbɔn -a ˈyeɛ -to -ka -a kman ʋbʋ aˈ dɩ ˈbho dhɩ kman ʋbʋ ˈˈbhli aˈ dɩ ˈtmʋan. Dhɛ ɛ ˈdha a, ɛmɛn- -nɩn -a ˈse ˈo dhɛ dhueˈ ˈˈkpe ˈnɛn in ˈˈdhe dhɩ kman ʋbʋ ˈˈbhli ɛ, -a ˈye -pɛɛ dhe -za -a ˈyɩ ˈˈkpe mun. -Kawɛ ˈmʋnfeesɛɛ- nɛn ɛn mun -aʋ sʋn bho -po -wɛeˈ -a ˈyeɛ nʋn -ɛn?

ˈMʋnfeesɛɛ- nɛn ˈbhleɛ ˈcɩaandhɩ aˈ 12 -ɩan- tɔɔn -abʋ kplɩn -a ˈyea ˈbhle -wɛeˈ -a ˈyea ɲʋn anˈ dɩ -kman ˈˈdhe -a ˈyea dhɛcɩaʋn nʋn ɛn. -Ka ˈcɩaandhɩ- -ˈnɩn dea dhueˈ dhueˈ ɛ, ɩn tbha ˈo -bo nɩan ˈe Biiblʋ ˈdhi -ɩan- ˈtmʋan kplɩn Zezi -aeˈˈ kletiɛn -ˈˈwe kɔan ɲan anˈ dhueˈ toa ˈdhe -bobhlaaˈ ˈˈkpe i. Ɩn ˈse -nʋʋɛn- -wɛeˈ -a ˈye dhɛtosʋn ˈˈdhru ˈdhi ˈbhlee- ˈklaa, ɩn ˈye -aʋ sʋn bho po ˈˈdhe -ka -a ˈyea ɲʋndɩkman- -to sʋn nʋn ˈdhe ɲʋn bho ɛ, -a ˈyeɛ i ˈbɔn. -Bho kplɩn -ˈnɩn -kɔn dɩ ˈdhe -aaˈ -bobhladhbho ɔˈ ˈfɛ ɛˈ klɛɛ ˈdhi -mɔnˈ -dhe ɛˈ, ɩanˈ -jɩn -a ˈyea -to gblein -bho -aa sa ˈe ɲʋn bho -ghwluaˈ dee -e -aa sa ˈo ɲʋn bho dhemun -aeˈˈ -a -nɩn ɲʋn an sa Biiblʋ ˈcɩan anˈ, ɩmɩn- -aa mun ˈjhe-.

-Bho -man sa ˈcɩaandhɩ- nɩn ˈcɩan anˈ, -ka -ˈyea kplɩn -ˈnɩn -to sʋn nʋn -bho -man sa ˈe ɲʋn nɩan ˈe -ˈman kpɔ ˈdhi bho ghwlu ɛˈ, -nɛɛn -tɔˈ ˈˈkpei. Po Zoova aˈ dɩkman- -e ɲʋn anˈ dɩkman- ˈˈkpe ˈdhe- ˈmʋn. Ɲʋndɩkman- -ˈnɛn -ɛ -ziia dhɩ -nʋn sʋn anˈ klɛɛ, ɛɛ muɛn aʋ sʋn bho -po aʋ ˈye dhɛcɩaʋn -nʋanˈ ˈbhɛɛ-.

Dhɛ -a -nɩn aʋa nʋʋan dhbho i ɛ, ɛ nɩn ˈˈɩnmɔɛn- -klaaˈˈ -ɛɛˈ dɩ -a -kman ˈjɛɛn-. (Soph. 3:9) Zoova kpa aʋaˈ ˈˈniman -poɛ ɲan -ka aʋa kpa ɲʋn anˈ dɩkman- ɲan ˈˈdhe aʋa nʋan dhɛcɩaʋn ɛn!