Etebantre aune ngwaitre tare nunkwe:

Ngöbö tare nikwe aune nita nitre tarere ye tä ni töi mike kukwe ne mike täte: “Mun nän, amne nitre nünanka kä jökräbti temen, ye […] mika ja töitikaka [ . . . ] amne munkwe niaratre ngöka ñöte” (Mat. 28:​19, 20; Mar. 12:​28-31). Nita ja tare metre bämike ngwane, ye raba mate mobe nguse nire nire “töita metre o bökän nünanbätä kärekäre” ye brukwäte (Hech. 13:​48, TNM).

Käne ni nämäne ja di ngwen drebätä blitai nikwe ye ketatekäre ja töite aune täräkwata biankäre nitre ie. Akwa nengwane nikwe blita kömikadre kwin ye ribeta. Kukwe meden tuen ütiäte nitre ie yebätä nikwe blitai bentre ngwane, nita ja tare bämike ietre. Ni itire itire ñan ja erebe, yebätä nikwe ñan ja töi mikadre blite kukwe keteitibebätä, ñakare aune kukwe meden tuen ütiäte ie aune dreta ngwen töbike ye nikwe ngwandre törö jai. ¡Tärä ne sribebare ni dimikakäre kukwe ye kräke!

Kukwe ja tötikara 12 tä tärä nebätä aune töi kwin 12 nita ribere jai ja tare bämikakäre aune nitre mikakäre ja tötikaka ye täbätä arato. Keteitire keteitire tä dianinkä Bibliabätä, känti Jesús o ni kristiano siklo kena kukwe ye bämikani diribare kwe ngwane. Kukwe niedre töbitibe ye ñan ribeta nie mada, ñakare aune nikwe kukwe nuaindre ja tare bämikakäre nitre ie. Nikwe ja töi mikadre ño dirikäre kwin mikata gare tärä nebätä ye ütiäte kä jökrä ngwane. Akwa ruäre ye bäri nikwe ja di ngwandre bämike blita kömikakäre, nitre tuabitikäreta aune nitre tötikakäre ye jutuai mäi.

Kukwe ja tötikara keteitibätä mäkwe ja tötikai ngwane, mäkwe kukwe ye bämikai ño nitre mä bäre ie mätä kukwe driere ngwane, yebätä töbike kwin. Jehová tare nikwe aune nita nitre tarere ye bäri ütiäte técnica o kukwe mada nuainta dirikäre ye kräke. Yebätä ja di ngwen Jehová tarere bäri aune nitre tarere bäri. Ye käkwe mä dimikai kukwe bäri ütiäte nuainne, ye abokän nitre mike ja tötikaka.

Munta kötä mike, gwairebe nunbe, sribi ütiäte ie ye käi juto krubäte nunbätä (Sof. 3:9). ¡Munkwe ja di ngwain jankunu nitre tarere aune mike ja tötikaka yebätä Jehovakwe kukwe kwin nuaindre krubäte mun kräke ie nun tö!