Bene-berhu na Bali-berhu Bazigirwa:

Obuzigire rhuherhe ku Mungu n’oku bantu bunarhushunika ‘kugenda . . . kujira abanafunzi omu bantu b’amashanja moshi, n’okubabatiza.’ (Mt. 28:19, 20; Mk. 12:28-31) Obuzigire burhengere oku murhima bujira misi minene. Bwakahuma oku mirhima ya balala “baherhe oborhere b’omurhima bukwanene akalamo k’esiku n’amango.”—Mdo. 13:48.

Mira, rhwaliri rhwachihangana kubika omu bwenge ebinwa by’okurhonderesa enganiro, n’okuntu rhwahaana ebitabu. Aliko zene bihemere rhuchihangane loshi kukwiza obuhashe bwerhu b’okurhonderesa enganiro. Rhulonzeze kuyereka abandi oku rhubazigiire omu kubabwira ebintu by’okubasimisa. K’okuderha ku rhukwanene kuba tayari kuhindamuka nk’okw’ehali yanahemere, n’okuwaza oku bilazize n’ebisimisize buli muntu. Nka gurhe kanola katabu karhurhabala kujira ntyo?

Kanola katabu kaherhe somo 12 ziyerekene engeso rhukwanene kukuza yi rhugala kuyerekana obuzigire n’okujira abanafunzi. Buli somo liyimangire oku ngani ye Biblia eyerekene gurhe Yesu changwa owindi muhubiri w’Obwami w’omu kagana ka burhanzi ayerekanaga eyola ngeso omu mahubiri. Omuhigo kurhali kubika omu bwenge ebinwa by’okurhonderesa enganiro, si kulonza okuntu rhwakayerekana obuzigire bwerhu oku bantu. Chiro akaba oku buli ngeso eli y’akamaro omu njira zoshi z’okuhubiri rhunakolesa, rhwabona nka gurhe ngeso ziguma zili z’akamaro bwenene amango m’okurhonderesa enganiro, okugalukira abantu, changwa okuongoza amafunzo me Biblia.

Ok’oli wasoma buli somo, owaze bwinja okuntu wakayerekana eyo ngeso amango oli waganira n’abantu b’aholamire. Ochihangane kukuza obuzigire bwawe ku Yehova n’oku bantu. Obola buzigire, bulushire obwindi bufundi boshi-boshi, bwakurhabala ohikire omuhigo gwawe g’okujira abanafunzi.

Rhusimire bwenene olukengo lunene rhuherhe l’okukola nenyu chirhugo oku chirhugo. (Sef. 3:9) Yehova abagishe bwenene oku munali mwagenderera kuzigira abantu n’okujira abanafunazi!