Palangga nga mga Utod:

Palangga naton ang Dios kag ang mga tawo, gani napahulag kita nga ‘kadtuan ang mga tawo sa tanan nga pungsod kag tudluan sila agod mangin disipulo kag bawtismuhan sila.’ (Mat. 28:​19, 20; Mar. 12:​28-31) May daku gid nga epekto ang pagpakita sing sinsero nga gugma. Matandog sini ang tagipusuon sang mga “may husto nga panimuot sa pagtigayon sing kabuhi nga wala sing katapusan.”​—Binu. 13:48.

Sang una, ginasaulo gid naton ang mga presentasyon kag ginapalig-on kita nga maghatag sing publikasyon. Subong, ginapalig-on kita nga pauswagon ang aton paagi sa pagpakig-istorya sa iban. Gusto naton ipakita ang aton pagpalangga sa iban paagi sa pag-istorya sa ila parte sa mga topiko nga gusto nila istoryahan. Buot silingon, dapat kita mag-adjust kag hunahunaon sing maayo kon ano ang mga ginakabalak-an kag nanamian sang iban. Paano ini nga brosyur makabulig sa aton nga mahimo ina?

Ini nga brosyur may 12 ka leksion nga nagatudlo sa aton sang mga kinaiya nga kinahanglan para mapakita naton ang pagpalangga sa iban kag tudluan sila nga mangin disipulo. Ang kada leksion nabase sa isa ka kasaysayan sa Biblia nga nagasugid parte kay Jesus ukon sa isa ka ebanghelisador sang unang siglo nga nagpakita sang isa ka kinaiya sa ministeryo. Ang katuyuan sini indi nga sauluhon ang mga presentasyon, kundi kon paano naton mapakita ang aton gugma sa mga tawo. Bisan pa kinahanglan naton ini nga mga kinaiya sa tanan nga bahin sang aton ministeryo, binagbinagon naton kon paano ang isa ka kinaiya kinahanglan gid kon nagasugod kita sa pagpakig-istorya, nagabalik sa interesado, ukon naga-Bible study.

Samtang ginatun-an mo ang kada leksion, pamensara sing maayo kon paano mo mapakita ina nga kinaiya kon nagaistorya ka sa mga tawo sa inyo lugar. Pabakura ang imo gugma kay Jehova kag sa mga tawo. Ina nga gugma, nga labaw pa sa bisan ano nga paagi sa pagministeryo, makabulig sa imo nga malab-ot ang imo tulumuron nga tudluan ang iban nga mangin disipulo.

Ginaapresyar gid namon ang daku nga pribilehiyo nga magpangabudlay upod sa inyo sing nahiusa. (Sof. 3:9) Kabay nga pakamaayuhon gid kamo ni Jehova samtang padayon ninyo nga ginapalangga ang mga tawo kag ginatudluan sila agod mangin disipulo!