Epchalchik:

An kʼanidhomtaláb axi i koʼonchal a Dios ani an atiklábchik in tʼajál abal ki leʼnaʼ ki belkaʼ axéʼ xi abatnaxtaláb: «Kit kʼalejchik tin puwél an tsabál, ka exóbchij tin patál an inikchik u káwintal abal ti kin tsʼatʼenchij ani ka pujaychik» (Mat. 28:​19, 20; Mar. 12:​28-31). Max chubax ki tejwamédhaʼ i kʼanidhomtaláb, neʼets ki ejtow ki tólmiy an atiklábchik axi chubax in leʼ ka utey kʼal a Dios ani kin batsʼuw an ejataláb abal etsʼey (Hech. 13:48).

Ti biyál i tsapnanchalak ki tsʼatʼaʼ ti okʼ an tsalap axi i leʼ ki ólchij an atiklábchik ani ki jilchij i publicaciones, pero xowéʼ kwaʼal ki aliy jantʼiniʼ ki tʼilmay an atiklábchik. I tejwamédhanchal i kʼanidhomtaláb axi kʼeʼat tam i otsʼowiyal ani i tokʼtsinchal axi in leʼ kin exlaʼ. Yab junat jawaʼ in tsalpayal an atiklábchik, jaxtám lej exbadh ki tʼajaʼ ti kwentaj jawaʼ tu ólchal ani kʼal jantʼoj tu tʼeʼpindháb an atikláb axi kʼwajat i tʼilmayal. Ani jats ti tsʼejkamej axéʼ xi folleto, abal tu ku tólmiy.

Axéʼ xi folleto in kwaʼal 12 i ajumtaláb axi in tajáx olnál jantʼiniʼ ki tejwamédhaʼ i kʼanidhomtaláb abal ki éjtow tu exóbchix. Al an ajumtalábchik in olnál jun i alwaʼ tʼajbiláb axi in tʼajaʼchik ban olnomtaláb a Jesús o jun i epchal axi ti kʼaʼál siglo. Yabáts i leʼ ki ólchij an atiklábchik jun i tsalap axi i neʼdhalits ti okʼ, xowéʼ i leʼ ki aliy jantʼiniʼ ki tejwamédhanchij abal i kʼanidhál. Belits abal an alwaʼ tʼajbiláb axi u olnáb al axéʼ xi folleto neʼets tu ku tólmiy ban olnomtaláb, neʼets ka tʼajaʼ ti kwéntaj abal talchik neʼets ti tólmiy abal ka tujchij ti tʼilom abal kit wichiy ka tsab tsaʼbiy an atiklábchik ani abal ka bínaʼ jun i exobintaláb kʼal an Biblia.

Tam ka exóbnaʼ jun i ajumtaláb, ka tsalpay jantʼiniʼ a éjtowal ka eyendhaʼ tam kit kʼalej tit ólnom juʼtáj it kʼwajíl. Jawaʼ más exbadh, jats an kʼanidhomtaláb axi i koʼonchal a Jehová ani an atiklábchik ani yab jantʼiniʼ i tsalpayal tu ólnom, jaxtám ki tsapnanchij ki koʼoy tsapik an kʼanidhomtaláb, axéʼ neʼets ti tólmiy abal ka ejtow tit exóbchix.

Pel jun i kulbetaláb ku tʼojon junkudh abal a Jehová (Sof. 3:9). ¡A Jehová kin aynanchij ti labliychik kom a tejwamedhál i kʼanidhomtaláb ani a tsapnanchal tit exóbchix!