Kovakambure ovakwetu ovasuverwa

Orusuvero rwetu ku Mukuru na kovandu ru tu hinga kutja ‘tu yende koviwaṋa avihe ngamwa akuhe nokukaisa po ovandu ovahongewa nokuvepapitisa.’ (Mat. 28:19, 20; Mar. 12:28-31) Indu tji tu norusuvero otja indwo kovandu, eṱe matu yenene okuvatera imba mbe “nomitima omiwa okukamuna omuinyo waaruhe.”—Oviung. 13:48, NWT.

Morukapitaveze, aatu yandja ombango okuṱiza ovihorera vyokuzuvarisa motjiuru nokuyandja oumbo. Nai matu sokuungurira komuano mbu tu hungira ku novandu. Matu sokuraisa orusuvero ku varwe mokuhungirira komapu ngu maye nana ombango yawo. Iho matji hee kutja matu sokuyenena okutjita omarundurukiro nokuripurira kozongendo nozonḓero zomundu auhe. Hapo okambo nga make tu vatere vi okutjita nao?

Okambo nga ke nomahongwa 12 ngu maye tu hongo ohunga novikaṋena mbi matu hepa kokutja tu raise orusuvero nokukaisa po ovandu ovahongewa. Mehongwa arihe mu nehungi rOmbeibela ndi mari yandja ombango kotjikaṋena Jesus poo Ovakriste veserewondo etenga tji va raisa motjiungura tjokuzuvarisa. Ondando yetu kayokuṱiza ovihorera vyokuzuvarisa motjiuru, nungwari oyokupaha omuano mbu matu yenene okuraisa orusuvero kovandu. Nandarire kutja ovikaṋena avihe mbyo mavi hepwa motjiungura tjokuzuvarisa, eṱe matu katara komuano ovikaṋena tjiva mu vi hepwa tjinene okuuta ehungi, okukavarura ovandu mba raisa onḓero, poo okurihonga Ombeibela ku novandu.

Otja tji mo tara kehongwa arihe, ripurira komuano mbu mo yenene okuraisa otjikaṋena ho, indu tji mo hungire ku novandu momaturiro woye. Kondjisa okukurisa orusuvero rwoye ku Jehova na kovandu. Orusuvero ndwo rwa kapita oviṋa avihe mbi tu ungurisa motjiungura tjokuzuvarisa, nu maru ku vatere okuyenenisa ondando yoye yokukaisa po ovandu ovahongewa.

Eṱe tu nondangi kondjingonekero yokuungura pu na ove. (Sef. 3:9) Jehova nge ku sere ondaya otja tji mo kayenda komurungu okusuvera ovandu nokukaisa po ovandu ovahongewa.