Ngagai Semua Bala Menyadi ke Dikerinduka Kami:

Pengerindu ngagai Petara sereta ngagai orang bukai deka meransang kitai ‘mupuk ngagai semua bansa, lalu ngajar sida nyadi murid sereta maptisa sida.’ (Mat. 28:​19, 20; Mrk. 12:​28-31) Pengerindu ti enda berundingka diri empu ulih mai kesan ti besai. Pengerindu nya deka negu ati sida ke “bisi pengingin deka nengah jalai ke nuju ngagai pengidup ti meruan belama iya.”—SKR. 13:48.

Suba, kitai bebendar ngafal chara ke dikena berandau sereta selalu ninggalka litaricha ngagai orang. Tang diatu, kitai patut bebendar agi ngemanahka chara kitai berandau enggau orang. Kitai deka ngayanka pengerindu ngagai orang bukai enggau chara berandau pasal topik ti diminat sida. Reti iya, kitai patut sedia ngaga ubah. Pia mega, kitai patut berati enggau manah pasal utai ke diminat sereta utai ke ngasuh orang ke ditemu kitai ba pengawa nginjil berasai irau. Baka ni brosur tu ulih nulung kitai ngereja nya?

Brosur tu bisi 12 iti pelajar. Tiap iti pelajar deka berandauka sifat ke patut dikemansangka kitai. Tu ketegal, tiap iti sifat nya penting ngambika ulih ngayanka pengerindu sereta ngaga orang nyadi murid. Nambahka nya, tiap iti pelajar bepelasarka siti cherita Bup Kudus ke betumpu ba sifat ti diayanka Jesus, tauka bala menyadi Kristian ari abad keterubah ba pengawa nginjil. Kitai ukai deka ngafal chara berandau enggau orang. Tang iya ke amat, tuju kitai nya, deka ngiga mayuh agi chara kena nunjukka pengerindu ngagai orang bukai. Endang amat, tiap iti sifat ke dikerandauka kitai ba brosur tu amat penting ba tiap iti aspek pengawa nginjil kitai. Tang, kitai deka beratika enggau silik agi pasal baka ni sekeda sifat deka mayuh agi nulung kitai kelebih agi lebuh kitai deka ngepunka randau, ngaga datai ngabas, tauka belajarka Bup Kudus enggau orang.

Seraya nuan beratika tiap iti pelajar ba brosur tu, perundingka enggau manah pasal chara nuan ulih ngayanka sifat ke dipelajar lebuh berandau enggau orang ba endur nginjil. Pia mega, bebendar meh ngenalamka pengerindu nuan ngagai Jehovah sereta ke orang bukai. Pengerindu nya beguna agi ari sebarang pengelandik ke dikembuan nuan, laban pengerindu deka nulung nuan nyapai juluk ati ngaga orang nyadi murid.

Kami amat beterima kasih laban bisi peluang ti besai ulih bekerejasama enggau kita. (Sep. 3:9) Arapka Jehovah merekatka nuan seraya nuan terus rinduka orang sereta ngaga orang nyadi murid!