Aanahị Alẹng Bala Anyang ị-Háahị Há:

Ọháha ọlẹ kahị la ẹ-ẹga nya Ohe Oluhye bala angịnyị ehe à kaa guhi gbịla nyọka ‘kpa ẹrụ ọnyịịla kele kaka ya je angịnyị ilepwoja myị́ epwoja, ká ịwa ayịdang ka ri angịjụgbẹyị bala o-hwaa enyi Ohe lẹ’. (Mat. 28:19, 20; Mak 12:28-31) Ọháha ọ-yẹ ịlọmwụ-ịlọmwụ kem ka la ọngịrị lụmẹ. Ọháha ọọwa kaa gu angịlẹ ká Ohe Oluhye “nwụlanọ nyọka ya ọhịhị ọmyịmyị-ka nyamwụ ha” ọ-ọkịlẹtụ.—Ụkụr 13:48.

Lụka ọkẹkpẹ, ahị kaa maga nyọka kpa egbeju nya ẹla ịhyẹ i-irya kahị ka ya je angịnyị bala ọ-ya apwụ haa. Ma, lẹẹlẹẹ ahị baba nyọka maga ka abwụma nya ẹla oyaya nyahị ka nwà kịlahị gụ olene-ene. Ahị tịtọ kahị ka mẹ ọháha jẹ ẹ-ẹga nya angịkịla bwula o-ya ẹla u-uhye nya egbeju nya ẹla ọlẹ kọ ka gwaa ọ-ọkịlẹtụ. Ọọwa ri ahị baba nyọka jẹ́-ẹ yẹda pwoku iwe-ahụrụ bala ọ-maga kahị ka jẹ́ ẹla ọlẹ kọ baba ha ọngọngọọng bala ọ-ka gwoo ọ-ọkịlẹtụ. Ányị ụpwụ ọlẹ à tị́ ka bwu dahị ụbwọ nyọka họ ịnyị?

Ụpwụ ochiche ọlẹ la ang ọjẹ́jẹ 12 ịlẹ ị ka mẹ abwẹla ịlẹ kahị baba jẹ́ẹhị chajị kahị ka jẹ́-ẹ mẹ ọháha jẹ angịnyị bala ọ-họ kị ka ri angịjụgbẹyị. Ang ọjẹ́jẹ ọnyọnyọọnyị kpụnịrọ abwẹla ọnyịiḷa ọhẹ ọlẹ ká iJisọsị lee ọngọhẹ lẹpwụ nya angịlẹ kị kpa ẹrụ ọnyịịla pyẹ lụka nya oye ọhọhẹ mẹjẹ ẹ-ẹpwụ nya ẹrụ ọnyịịla ọ-kpa pyẹ. Ang ọlẹ kahị tịtọ á ri ọ-ka kpịtịya nya egbeju nya ẹla ịhyẹ ịlẹ kahị kpa i-irya kahị ka ya je angịnyị kem ka, ma ahị ka mwahị nya agbẹyị ịlẹ kahị ka mẹjẹ nyori angịnyị háahị. Nanana nyori ahị baba nya abwẹla ịnyịịla ịwẹ wuu ẹ-ẹpwụ nya ụpa ọnyị myị́ ọnyị nya ẹrụ ọnyịịla ọ-kpa pyẹ nyahị, ahị wẹ ka kụ ẹhị yẹ abwẹla ịhyẹ ịlẹ kị baba kpọnchị ụka kahị ka dọmwụ nya ẹla oyaya bala angịnyị, ụka kahị ka ọmwẹẹkpẹ ka lee ụka kahị ja jẹ́ ịBayịbụụ bala angịnyị.

Ụka ká ja jẹ́ ang bwu ang ọjẹ́jẹ ọnyị myị́ ọnyị, kụ irya kpẹnẹẹ ju abwọlẹ ká ka mẹ abwẹla ọwẹ jẹ ụka ká ja ya ẹla ta angịnyị ẹ-ẹga ọlẹ ká kụ. Maga ká ju ọháha ọlẹ ká la ẹ-ẹga nya iJihova bala angịnyị ọngịrị gụ ọọwa. Ọháha ọọwa, kọ gụ ijẹẹhị ọ-kpa họ ang ịkịla wuu, ka dang ụbwọ nyọka wu ang ọlẹ ká chị nọ ha ịlọng ọyị kọ ri ọ-ka họ ká angịnyị ka ri angịjụgbẹyị.

Ọ-myịhị lẹhị lụmẹ nyọlẹ kahị la iwe nyọka họ ụkụrwọ lawụlẹ balang. (Sẹf 3:9) IJihova a wahị kụrụng chịba-chịba jaabwọ ká wẹẹ kịnyaa la ọ-ka mẹ ọháha jẹ ẹ-ẹga nya angịnyị bala ọ-họ kị ka ri angịjụgbẹyị!