Wó Tarị Wẹrịemi Bịnaotu-ama:

Omịnị akị Ọkpọnanaowei mọ, zịnị-otu mọ a nana wẹrịemi tarị kị wó dịnẹmọ wẹrị “akpọyọrọịsẹ amú . . . tuuduo-otu dọụ bá a kọn benibilemọmịnị.” (Matt. 28:​19, 20; Mark 12:​28-31) Adụdụ duobo-emi tarị mị kụrọnana wẹrịemi. Anịduonị omịnị adụdụ duo kịmịotu tarị wẹrịemi aba, laa baratụa “fagha fagha ụndụ nana dịsẹ-emi” otu pịrị a paaemi.—Acts 13:48.

Bụọdẹ ifie bị, omịnị kẹnị egberi ka kị ịkịọụ a tụa wẹrị kịmị mọ ẹrẹtei bá fun koromọ a pịrịtimi mị. Anịa beitịẹkiri bị, omịnị angọtụa wẹrị ẹrẹtei ụwọụ ka kị egberigbaa kịmị pịrị agbẹịemi. Bịsẹ bara mịẹmụ yọmị, omịnị a tarị wẹrịemi bara mịẹdịa agbẹịemi, anịduonị omịnị a dịsẹ-emi egberitịbịama, bá anị emi tịẹkiri kị dii wẹrị a mọmọ́ ẹrẹtei agbẹịemi. Bei fun bị, tebara ka kị baratụa wó pịrịwẹrị bịsẹ yọ mịẹbeinmọ a paaemi a o?

Bei fun bọọ emi 12 tolumọyebo baratụa wó pịrịwẹrị kịmịotu tarị, bá tuuduo-otu dọụ fịrịwẹnịmụ inyenrinbụọ-ama nana mịnị. Egberitịbịbosẹ Jesus mọ bọlọụ kụraị sọọnransii bọọ egberigbaatimi otu, egberigbaa yọ bọọ mịẹdịa inyenrinbụọ-ama kị gbaa wẹrịemi. Omịnị kẹnị egberi akị ịkịọụ a tụa wẹrị kịmị mọ ẹrẹtei mọ bara mịẹkụmọ, anịa omịnị tarị mịẹdịamụ yọ ka kị ịkịọụ a wẹrị. Omịnị egberigbaa yọ bọọ ebi inyenrinbụọ-ama mịẹdịa agbẹịemi, anịa, omịnị kịmị mọ koro ẹrẹtei, waị mú kịmịotu laa bá kịmị mọ Bible tolumọmịnị ifie bị, gbẹsịị wó nana agbẹịemi inyenrinbụọ-ama kị ditụa mịnị.

Fun bị ị́ mọ goomịnị ifie bị, ị́mịnị laa fun bọọ gbaa wẹrịemi inyenrinbụọbo akị, iné ete bọọ emi otubo mọ ẹrẹteimịnị ifie bọọ mịẹdịa a paaemi bara bị kẹrị iroro. Ị́mịnị akị Jehovah mọ kịmịotu mọ ghọ nana wẹrịemi tarị mịẹkụrọmọ. Bịsẹ tarị kị baratụa ị́ pịrịwẹrị ebibara tuuduo-otu dọụ fịrị wẹnị beinmọ mịnị.

Omịnị a mọmọ́ wẹnị gbelei fomuun nana yọ bị, wó mịẹ pọwẹịmịnị. (Zeph. 3:9) Pebidá, ámịnị pẹlẹgha bara kịmịotu tarị bá tuuduo-otu dọụmịnị yọmị Jehovah biin tarị-ama akị a pịrị!