Patgenmi a Kakabsat:

Ti ayat iti Dios ken kadagiti tattao ti mangtignay kadatayo a mapan ‘kadagiti tattao iti amin a nasion tapno pagbalinen ida nga adalan ken bautisaran.’ (Mat. 28:​19, 20; Mar. 12:​28-31) Ti managsakripisio nga ayat ket nabileg. Kabaelanna a danonen ti puso dagidiay “addaan iti umiso a kababalin nga umawat iti agnanayon a biag.”—Ara. 13:48.

Ikabkabesatayo idi dagiti presentasiontayo, ken nakapokustayo iti panangipaima kadagiti literatura. Ngem ita, masapul a parang-ayentayo ti abilidadtayo a makisarita kadagiti tattao. Ipakpakitatayo nga ay-ayatentayo dagiti tattao no dagiti topiko a paginteresanda ti pagtungtongantayo. Makibagaytayo ngarud ken ikabilangantayo ti kasapulan ken paginteresan ti tunggal kasabaantayo. Kasano a matulongannatayo daytoy a broshur a mangaramid iti dayta?

Adda 12 a leksion iti daytoy a broshur a mangitampok kadagiti kualidad a kasapulantayo tapno maipakitatayo ti ayat ken makaaramidtayo kadagiti adalan. Ti kada leksion ket naibatay iti maysa a salaysay iti Biblia a mangitampok iti maysa a kualidad nga impakita ni Jesus wenno ti dadduma pay nga ebanghelisador iti ministerio idi umuna a siglo. Agpokustayo kadagiti pamay-an a maipakitatayo ti ayattayo kadagiti tattao, saan ket a ti panangikabesa kadagiti presentasion. Iti amin nga aspeto ti ministeriotayo, kasapulantayo nga ipakita amin dagita a kualidad. Ngem kitaentayo no kasano a makatulong dagiti espesipiko a kualidad no mangirugitayo iti saritaan, no agsarungkartayo, wenno no mangyadaltayo iti Biblia.

Bayat nga ad-adalenyo ti kada leksion, panunotenyo a naimbag no kasanoyo a maipakita dayta a kualidad no makisaritakayo kadagiti tattao iti lugaryo. Ikagumaanyo a paunegen ti ayatyo ken Jehova ken kadagiti tattao. Adu a teknik ti mabalin a makatulong kadatayo nga agaramid iti adalan, ngem ti ayat ti mas makatulong kadatayo.

Ibilangmi a dakkel a pribilehio ti makipagtrabaho kadakayo iti abagan-abaga. (Sof. 3:9) Sapay koma ta bendisionannakayo ni Jehova bayat nga itultuloyyo nga ayaten dagiti tattao ken agaramid iti adalan!