Inievo-Emezae gbe Emetẹ Eghaghae Mai:

Uyoyou nọ ma wo kẹ Ọghẹnẹ gbe ahwo, o be wọ omai “nya, re [ma] ru ahwo zihe ruọ ilele evaọ udevie ahwo erẹwho na kpobi.” (Mat. 28:19, 20; Mak 12:28-31) Uyoyou nọ o rẹ rehọ ewoma amọfa karo u wo ẹgba gaga. O rẹ sai duobọte udu ahwo nọ “a wo emamọ eva, nọ a ti wo uzuazọ ebẹdẹ bẹdẹ.”—Iruẹru 13:48.

Evaọ oke nọ u kpemu, oware nọ ma jẹ hae mai ru họ, ma re wuhrẹ uzoẹme jọ fihọ uzou nọ ma rẹ rọ ta usi uwoma, ma vẹ jẹ rehọ ebe kẹ ahwo. Rekọ enẹna, o gwọlọ nọ ma re wuhrẹ epanọ ma re ro lele ahwo ta ẹme ziezi. U fo nọ ma rẹ hae ta kpahe izoẹme nọ e rẹ were ahwo, re ma rọ ere dhesẹ kẹ ae nọ ma you rai. Re ma sai ru ere, ma rẹ nabi roro kpahe oware nọ o be kẹ omomọvo uye gbe oware nọ o rẹ were iẹe, ma vẹ ta ẹme rri obei. Ẹvẹ ibroshọ nana o ti ro fiobọhọ kẹ omai ru ere?

Iwuhrẹ ikpegbivẹ e rrọ ibroshọ nana, yọ a jarai ta kpahe iruemu nọ ma re wo re ma sai dhesẹ uyoyou kẹ ahwo je fiobọhọ kẹ ae zihe ruọ ilele. Evaọ uwuhrẹ ọvuọvo, ma te ruẹ epanọ Jesu hayo omọfa jọ evaọ Ebaibol na nọ ọ jọ ọtausiwoma evaọ ikpe-udhusoi ọsosuọ o ro dhesẹ uruemu na jọ evaọ usi uwoma ota. Oware nọ o mae rrọ omai oja họ, epanọ ma re ro dhesẹ uyoyou kẹ ahwo, orọnọ epanọ ma re ro wuhrẹ eme nọ ma rẹ rọ ta usi uwoma fihọ uzou hu. O make rọnọ u fo nọ ma re wo iruemu nana kpobi evaọ kabọ kabọ usi uwoma ota mai na, ma te ruẹ epanọ ugogo iruemu jọ e te mai ro fiobọhọ kẹ omai nọ ma te bi mu ẹme họ, nọ ma te kpohọ ozihebro, hayo nọ ma te bi wuhrẹ Ebaibol kugbe ahwo.

Nọ who bi ti se uwuhrẹ ọvuọvo na, roro ziezi kpahe epanọ whọ sai ro dhesẹ uruemu na evaọ okenọ whọ tẹ be ta usi uwoma kẹ ahwo ẹwho ra. Daoma ziezi re whọ sai you Jihova gbe ahwo vi epanọ who you rai vẹre. O make rọnọ ugogo onaa jọ nọ ma wo o sai fiobọhọ na, whọ te ruẹ nọ uyoyou nọ ma re dhesẹ o te sai gine fiobọhọ kẹ owhẹ ru ahwo zihe ruọ ilele.

Eva e were omai gaga nọ ma bi ro lele owhẹ ru iruo no ẹkoko te ẹkoko. (Zẹf. 3:9) Jọ Jihova ọ ghale owhẹ ziezi nọ whọ be daoma re who gbe you ahwo je fiobọhọ kẹ ae zihe ruọ ilele na!