Wi Bredaz an Sistaz:

Wen wi lov Gad an wi lov piipl, dat wi elp wi fi du wa Jiizas did tel wi fi du wen im se: “Gwaan . . . tiich mi mesij tu piipl evriwe, so dem kyan ton mi falara tu . . . an baptaiz dem.” (Mat. 28:19, 20; Maak 12:28-31) Wen wi lov piipl an put dem bifuo wiself, uol iip a gud tingz kyan apm, an it kyan riili elp di wan dem we a shuo se dem waahn “fi liv fi eva.”​—Aks 13:48.

Wen wi a priich an tiich, wi yuus tu chrai fi memba di egzak ting we wi a-go se tu di sumadi we wi a taak tu an ou wi kyan lef buk an pamplet wid dem. Bot wa wi waahn fi du rait ya nou a si ou wi kyan taak tu piipl beta. Wi waahn piipl fi si se wi lov dem wen wi taak bout di sitn dem we dem waahn fi taak bout. Dat miin se wi gweehn afi chienj op di wie ou wi du tingz an wi afi tingk bout di sumadi we wi a taak tu an di sitn dem we dem bizniz bout. Ou da pamplet ya gweehn elp wi fi du dat?

A 12 lesn de iina da pamplet ya. Iina dem lesn ya, wi a-go luk pan som wiez we wi niid fi av ef wi a-go shuo se wi lov piipl an waahn fi elp dem fi ton Jiizas falara. Di lesn dem set op iina wan wie we yu a-go si ou Jiizas ar sumadi we did a priich iina di apasl dem taim did du tingz we mek wi si se dem did a shuo wan a dem wiez de. Wi no waahn fi a chrai fi memba di egzak ting we wi a-go se wen wi a priich, bot wi waahn fi si ou wi kyan shuo se wi lov di piipl dem we wi a priich tu. Wi niid fi av aal a di wiez dem we wi a-go taak bout wen wi a du di priichin wok, bot iina da pamplet ya wi a-go si wa mek dem impuotant wen wi a staat taak tu piipl fi di fos taim, wen wi a go bak go taak tu dem, an wen wi a du wan Baibl stodi.

Wen yu a stodi di difrant difrant lesn dem, chrai fi tingk bout ou yu kyan shuo se yu av dem wiez ya wen yu a priich tu di piipl dem iina fi yu ieriya. Wok aad fi lov Jeuova wid aal a yu aat an fi lov piipl tu. Di sitn dem we yu a-go lorn iina da buk ya a-go elp yu, bot a da lov de a-go riili push yu fi elp piipl ton Jiizas falara.

Wi riili api fi a wok tugeda wid unu. (Zef. 3:9) Wi prie se Jeuova wi gwaan bles unu wen unu a du evriting we unu kyan du fi shuo se unu lov piipl an a elp dem fi ton Jiizas falara.