Yatsurua umarua:

Yuus anea asar tura aents anea asar ju chicham tana nu umiktiniaitji: “Ashi nunkanam werum ashi shuar wi shuar ajasarat tusarum jintintiatarum. Turarum [...] imiaitiarum” (Mat. 28:​19, 20 TNM; Mar. 12:​28-31). Aents aneakrikia nekas yainminiaitji. Tuke iwiaku pujustinian wakeruiniana nu ni iwiakmarin yapajiat tusar yainminiaitji (Tur. 13:48).

Yaunchukka papii suakur itiura titiataj tusar ti nukap iwiarna wemiaji. Tumaitkiusha yamaikia aentsjai yupichuch aujmattsatin unuimiatratniuitji. Aents anena asar ni nekaattsar wakeruiniamu ujainiaji. Ashi aents metekrak enentaimcha ainiawai. Antsu warinia nekaataj tusa wakera tura warinma enentaimia nuna aujmattsamniaitji. Nu enentaijiai ju papii najanamuiti.

Ju papiinmanka 12 akankamu awai tura nuinkia anenkratin atasar tura chikich aents Kristu aents ajasat tusar uruku atiniaitiaj nuna aujmatui. Akankamu irunna nuinkia Jesús turutskesha Kristu aents armiania nu Yuusa chichame etserainiak itiur iniakmamsarmia nuna aujmatui. Yamaikia etserkur warintiataj nu unuimiatramu timiatrusrik titiniaitji tatsuji antsu aents anena asar warinkish turattaji taji. Ju papiinium uruku atiniaitiaj nuna aujmateana nuka aentsjai aujmateamunam tura waketrukir iyuwamunam nuya Yuusa chichame unuiniamunam yainmakminiaitji.

Akankamu irunna nu chikichkimsam unuimiatkum nui tana aitkiasmek Yuusa chichame etsermanumsha itiura turamniaitiam nui enentaimsata. Jehová tura chikich aentscha aneastasam kakarta. Ainis turakmeka chikich aents Kristu aents ajasarat tusam yainkiartatme.

Atumjiai metek takakmastinkia ti penkeraiti (Sup. 3:9). Chikich aents anena asarum Kristu aents ajasarat tusarum yaimiarmena nui Jehová yainmaktarum.