Ana-a-asa na Eĩtu-a-asa Endwa:

Kũmwenda Ngai na andũ nĩkũtumaa tũatĩĩa mwĩao ũũ: “Endai . . . mũkatwʼĩkĩthye andũ ma mbaĩ syonthe amanyĩwʼa, na kũmavatisa.” (Mt. 28:​19, 20; Mko. 12:​28-31) Wendo ũte na wanganganyʼa nũtethasya mũno. No ũkiite mũno ala me na “ngoo nzeo kwondũ wa thayũ wa tene na tene.”—Meko 13:48.

Navu ĩtina, tũnendaa mũno kũtiĩa andũ mavuku na kwĩkĩa kĩlĩkonĩ kĩla tũũmatavya. Ĩndĩ yu twĩenda kwongelanga ũtũĩka witũ wa kũea ngewa namo. Twĩenda kũmonyʼa nĩtũmendete kwa kũneenea maũndũ ala meũmendeesya. Na ũu nĩ kwasya, kwĩthĩwa tũtonya kũalyũkana na maũndũ na kũsisya nesa tũmanye nĩ maũndũ meva meũthĩnyʼa kana mekwendeesya kĩla ũmwe woo. Mbulosua ĩno yĩtũtetheesya ata kwĩka ũu?

Mbulosua ĩno yĩ na masomo 12 maneeneete nguma itonya kũtũtetheesya twende andũ na tũimatwʼĩkĩthya amanyĩwʼa. Kĩla ĩsomo yĩ na ngewa yĩ Mbivilianĩ yonanĩtye nguma ĩmwe Yesũ kana ũmwe wa Aklĩsto ma ĩvinda ya atũmwa woonanisye ũtavanyʼanĩ. Kĩeleelo nĩ kwona ũndũ tũtonya kwonyʼa andũ kana nĩtũmendete, ĩndĩ ti kwĩkĩa kĩlĩkonĩ maũndũ ala tũkwenda kũmatavya. O na kau kĩla nguma nĩyendekaa nzĩanĩ syonthe sya ũtavanyʼa, nĩtũkwona nguma ila itonya kũtũtetheesya mũno mũno kwambĩĩsya ũneenanyʼa, kũsyokea mũndũ, kana kwambĩĩa kũmũmanyĩsya Mbivilia.

Nthĩnĩ wa kĩla ĩsomo, sũanĩa mũno ũndũ ũtonya kwonanyʼa nguma ĩsu yĩla ũũneena na andũ kĩsionĩ kyenyu. Tata ũmwende Yeova na andũ ala angĩ mũnango. Wendo ũsu ũkaũtetheeasya kwĩanĩsya kĩeleelo kyaku kya kũtwʼĩkĩthya andũ amanyĩwʼa kwĩ nzĩa ĩngĩ o na yĩva ũtonya kũtũmĩa ũtavanyʼanĩ.

Twĩũtũngĩa mũvea mũno nũndũ wa kwĩthĩwa tũtonya kũthũkũma vamwe naku na ngoo ĩmwe. (Nzev. 3:9) Yeova nakũathime mũno nũndũ wa kĩthito kyaku kya kwenda andũ na kũmatwʼĩkĩthya amanyĩwʼa!