Nos irmons i irmans ki nu krê txeu:

Amor pa Deus i pa pesoas ta motiva-nu pa nu obi ku kel órdi ki Jizus da: “Nhos bai i nhos inxina algen di tudu nason pa es bira nhas disiplu. Nhos batiza-s”. (Mat. 28:19, 20; Mar. 12:28-31) Amor di verdadi ten txeu puder. Si nu ten kel tipu di amor li pa pesoas, nu ta pode djuda kes ki ten “bon atitudi pa ganha vida pa tudu ténpu”. — Atus 13:48.

Antis, nu ta konsentraba na dikora aprizentasons i na dexa pesoas ku publikasons. Má gósi nu meste sforsa pa midjora nos kapasidadi di pâpia ku otus algen. Nu krê mostra pesoas amor i nu ta faze kel-li óras ki nu ta pâpia ku es sobri kes asuntu ki ta interesa-s. Kel-li krê fla ma nu meste ser ikilibradu i pensa dretu na kuzê ki ta preokupa i interesa kada algen. Modi ki es bruxura ta ben djuda-nu faze kel-li?

Es bruxura ten 12 lison ki ta inxina-nu kualidadis ki nu meste dizenvolve pa nu mostra amor i faze disiplus. Kada lison ten bazi na un stória di Bíblia ki ta inxina-nu sobri un kualidadi ki Jizus ô kes primeru kriston na ténpu di apóstlus mostra na pregason. Obijetivu é djobe maneras di mostra amor pa pesoas envês di dikora aprizentasons. Enbóra kada kualidadi é inportanti na tudu ária di nos trabadju di pregason, nu ta ben odja modi ki alguns kualidadi é txeu inportanti óras ki nu ta kumesa ta pâpia ku pesoas, faze revizitas ô faze studus di Bíblia.

Óras ki bu ta analiza kada lison, pensa ku kuidadu sobri modi ki bu pode mostra kada un di kes kualidadi óras ki bu ta pâpia ku pesoas na undi ki bu ta mora. Sforsa pa bira bu amor pa Jeová i pa pesoas más fórti. Kel amor li, é más inportanti di ki kalker kapasidadi i el ta ben djuda-u alkansa bu méta di faze disiplus.

Nu ta da txeu valor pa priviléjiu di trabadja djuntu ku bo. (Sof. 3:9) Pa Jeová kontinua ta abênsua nhos txeu, timenti nhos ta kontinua ta mostra amor pa pesoas i ta faze disiplus!