Ex qechpaabʼanel:

Saʼ xkʼabʼaʼ naq naqara li Yos ut ebʼ li qas qiitzʼin, aʼin nokoorekʼasi chi xpaabʼankil li taql: «Ayuqex ut kʼehomaq choʼq intzolom ebʼ li qas qiitzʼin re chixjunilebʼ li tenamit. Teekubʼsihebʼ xhaʼ» (Mat. 28:​19, 20; Mar. 12:​28-31). Wi relik chi yaal naq nokoorahok, tooruuq xtenqʼankilebʼ li qas qiitzʼin «li nekeʼraj wank saʼ xbʼehil li junelik yuʼam» (Hech. 13:48).

Junxil naqayal qaqʼe re naq tkanaaq saʼ li qakʼaʼuxl li esil li tqakʼe chi naweʼk rehebʼ li qas qiitzʼin ut xkʼebʼal rehebʼ li hu. Abʼan anaqwan aajel ru naq tqatzol chanru tooʼaatinaq rikʼinebʼ. Naqakʼutbʼesi li qarahom rehebʼ li junchʼol naq nokooʼaatinak chirix li nawulak chiruhebʼ aʼan. Moko juntaqʼeetebʼ ta li junjunq chi qas qiitzʼin, joʼkan naq tento tqakʼe saʼ ajl chirix li yookebʼ wiʼ xkʼaʼuxl ut chirix li nekeʼraj rabʼinkil. Li hu aweʼ nokooxtenqʼa re naq tooruuq xtawbʼal aʼin!

Saʼ li hu aʼin wank kabʼlaju li tzolom li naxkʼut kabʼlaju li chaabʼil naʼlebʼ li tento tqayuʼami re naq tqakʼutbʼesi li rahok ut tqatzolebʼ li qas qiitzʼin. Saʼ li junjunq chi tzolom wank reetalil li Jesús malaj junaq chik li qas qiitzʼin li xwank chaq saʼ xkutankilebʼ li apóstol. Ebʼ li qas qiitzʼin aʼin xeʼxyuʼami chaq ebʼ li chaabʼil naʼlebʼ naq yookebʼ chaq xbʼaanunkil li xkʼanjel li Yos. Li qajom maawaʼ xxokbʼal saʼ li qakʼaʼuxl li esil li naqaj xkʼebʼal chi naweʼk. Li naqaj anaqwan aʼan xkʼutbʼal chiruhebʼ li qas qiitzʼin naq naqarahebʼ. Usta aajel ru li chaabʼil naʼlebʼ re xbʼaanunkil li qakʼanjel chiru li Yos, qʼaxal wank wiʼ chik xwankil naq tqatiqibʼ aatinak, tooʼulaʼaninq ut tqatzolebʼ li qas qiitzʼin chirix li Santil Hu.

Naq taatzol li junjunq chi tzolom, kʼe aachʼool chi xkʼoxlankil chanru taayuʼami ebʼ li chaabʼil naʼlebʼ aʼin naq taakʼe chi naweʼk li raatin li Yos rehebʼ li qas qiitzʼin li wankebʼ saʼ laateep. Li qarahom chirix li Jehobʼa ut chirixebʼ li qas qiitzʼin qʼaxal wank xwankil chiru yalaq kʼaru li naʼlebʼ li naru naqoksi. Joʼkan naq bʼaanu chixjunil li wank saʼ laawuqʼ re naq tkʼiiq laarahom. Li rahom aʼin tatxtenqʼa re naq tatruuq xbʼaanunkil li nakaasikʼ: xtzolbʼalebʼ li qas qiitzʼin chirix li Santil Hu.

Qʼaxal oxloqʼ kʼanjelak eerochbʼeen ut saʼ junajil (Sof. 3:9). Li Jehobʼa taxaq chiʼosobʼtesinq eere chi yoʼon xbʼaan naq nekeekʼe eeqʼe chi xbʼaanunkil li kʼanjel aʼin, nekeekʼutbʼesi leerahom ut aʼin natenqʼank eere chi xtzolbʼalebʼ li qas qiitzʼin!