Aarĩ na Ariũ a Ithe Witũ Ende:

Wendo witũ harĩ Ngai na harĩ andũ nĩ ũtũtindĩkaga ‘gũthiĩ gũtua andũ arutwo kuuma ndũrĩrĩ-inĩ ciothe, tũkĩmabatithagia.’ (Mat. 28:​19, 20; Mar. 12:​28-31) Wendo wa kwĩima nĩ ũhutagia andũ na njĩra nene. No ũhutie ngoro cia arĩa marĩ na “mwerekera ũrĩa wagĩrĩire wa kũheo muoyo wa tene na tene.”—Atũm. 13:48.

Hau kabere, tũrekĩrĩire mũno kũiga ciugo iria tũkuuga meciria-inĩ na kũheana mabuku. No rĩu tũrabatara kwĩrutanĩria kwagagĩria ũhoti witũ wa kwaranĩria na andũ. No twende kuonia andũ arĩa angĩ wendo na njĩra ya kwarĩrĩria maũndũ marĩa o mangĩkenio nĩmo. Ũguo nĩ kuuga twagĩrĩirũo gũkorũo twĩhaarĩirie kũgarũrĩra ndeereti na gwĩciria maũndũ marĩa o mũndũ angĩkenio nĩmo kana marĩa maramũthumbũra. Broshua ĩno ĩgũtũteithia atĩa gwĩka ũguo?

Broshua ĩno ĩrĩ na mathomo 12 maronania ngumo iria tũrabatara gũkũria nĩguo tuonanie wendo na tũtue andũ arutwo. O ithomo rĩrĩ na ũndũ uumĩte Bibilia-inĩ ũgũtũteithia kuona ngumo yonanirio nĩ Jesu kana Akristiano a karine ya mbere ũtungata-inĩ wao. Muoroto witũ ti kũiga ciugo iria tũkuuga meciria-inĩ, no nĩ gũcaria njĩra iria tũngĩonia andũ wendo nacio. O na gũtuĩka ngumo ciothe nĩ cia bata ũtungata-inĩ ngũrani, nĩ tũkwarĩrĩria ũrĩa ngumo imwe ibataranagia makĩria rĩrĩa tũrambĩrĩria ndeereti, rĩrĩa tũracokera andũ, kana rĩrĩa tũreruta Bibilia na andũ.

Ũgĩthuthuria o ithomo, wĩcirie na kinyi ũrĩa ũngĩonania ngumo ĩrĩa yarĩrĩirio ithomo-inĩ rĩu rĩrĩa ũraria na andũ a gĩcigo kĩanyu. Wĩrutanĩrie gwĩkĩra hinya wendo waku harĩ Jehova na harĩ andũ. Wendo ũcio nĩguo ũgũgũteithia gũkinyĩra muoroto waku wa gũtua andũ arutwo, gũkĩra njĩra o yothe ũngĩhũthĩra.

Nĩ tũkenagĩra mweke wa mwanya wa kũrutithania wĩra hamwe na inyuĩ twĩ na ũrũmwe. (Zef. 3:9) Jehova aromũrathima mũno mũgĩthiĩ na mbere kwenda andũ na kũmatua arutwo!