باسقارۋشى كەڭەستىڭ حاتى
قادىرمەندى باۋىرلاستار!
قۇدايعا جانە ادامدارعا دەگەن سۇيىسپەنشىلىك ٴبىزدى «بارلىق حالىقتاردان شاكىرتتەر دايىنداپ، ولاردى... شومىلدىرۋ راسىمىنەن وتكىزۋگە» قوزعاۋ سالادى (مات. 28:19، 20؛ مار. 12:28—31). رياسىز سۇيىسپەنشىلىكتىڭ كۇشى زور. ول ماڭگى ومىرگە ىڭعاي تانىتقان جانداردىڭ جۇرەگىن قوزعاۋى مۇمكىن (ەل. ٸس. 13:48).
بۇرىنىراقتا ٴبىز ۇسىنىس ۇلگىلەرىن جاتتاپ، ادەبيەتتەردى قالدىرىپ كەتۋگە كوبىرەك نازار اۋداراتىنبىز. ال قازىر ادامدارمەن اڭگىمە باستاۋعا، سويلەسۋگە كوبىرەك كۇش سالىپ جاتىرمىز. ٴبىز ادامدارمەن ولاردى قىزىقتىراتىن تاقىرىپتارعا سويلەسىپ، وسىلايشا سۇيىسپەنشىلىك تانىتقىمىز كەلەدى. بۇل دەگەنىمىز بەيىمدەلگىش بولۋدى جانە ٵر ادامنىڭ ۋايىمىنا، قىزىعاتىن جايتتارىنا مۇقيات بولۋدى بىلدىرەدى. وسى ورايدا، بۇل كىتاپشانىڭ تيەر كومەگى قانداي؟
بۇل كىتاپشادا 12 ساباق بار. ٵر ساباقتا ادامداردى جاقسى كورۋگە جانە شاكىرت دايىنداۋعا كومەكتەسەتىن قاسيەتتەر تالقىلانادى ٵرى ولار كيەلى كىتاپتاعى ٴبىر وقيعاعا نەگىزدەلگەن. مىسالى، يسانىڭ نەمەسە I عاسىرداعى ٴبىر ٴماسىحشىنىڭ قىزمەتتە قانداي دا ٴبىر قاسيەتتى قالاي تانىتقانى قاراستىرالادى. ماقساتىمىز — ۇسىنىس ۇلگىلەرىن جاتتاپ الۋ ەمەس، ادامدارعا سۇيىسپەنشىلىك تانىتۋدىڭ جولدارىن تابۋ. ارينە، قاسيەتتەردىڭ بارلىعى قىزمەتىمىزدىڭ بارلىق سالاسىندا قاجەت. بىراق اڭگىمە باستاعاندا، ادامعا قايتا بارعاندا جانە كيەلى كىتاپ زەرتتەۋ ساباعىن وتكىزگەندە ٴبىز اسىرەسە قانداي قاسيەتتەردى تانىتۋىمىز كەرەكتىگىن وسى كىتاپشادا قاراستىرامىز.
ٵربىر ساباقتى قاراستىرعاندا، سول ساباقتاعى قاسيەتتى جەرگىلىكتى ادامدارمەن سويلەسكەندە قالاي تانىتا الامىن دەپ ويلانىڭىز. ەحوباعا جانە ادامدارعا دەگەن سۇيىسپەنشىلىگىڭىز تەرەڭ تامىر جايا بەرسىن. مۇنداي سۇيىسپەنشىلىك كەز كەلگەن تاسىلدەن اناعۇرلىم ارتىق جانە ول سىزگە شاكىرت دايىندايمىن دەگەن ماقساتىڭىزعا جەتۋگە كومەكتەسەدى.
سىزدەرمەن يىق تىرەسە قىزمەت ەتۋ — ٴبىز ٷشىن زور قۇرمەت (ساف. 3:9). ادامداردى جاقسى كورىپ، شاكىرت دايىنداپ جۇرگەن سىزدەرگە ەحوبا مولىنان باتاسىن جاۋدىرسىن!
باۋىرلاستارىڭىز،
ەحوبا كۋاگەرلەرىنىڭ باسقارۋشى كەڭەسى