សំបុត្រពីគណៈអភិបាល
ជូនចំពោះបងប្អូនជាទីស្រឡាញ់!
ការស្រឡាញ់ព្រះនិងមនុស្សឯទៀត ជំរុញចិត្តយើងឲ្យ«ទៅបង្រៀនមនុស្សគ្រប់ជាតិសាសន៍ឲ្យក្លាយជាអ្នកកាន់តាម[គ្រិស្ត] ហើយជ្រមុជទឹកឲ្យពួកគេ»។ (ម៉ាថ. ២៨:១៩, ២០; ម៉ាក. ១២:២៨-៣១) សេចក្ដីស្រឡាញ់ដែលមិនគិតប្រយោជន៍ផ្ទាល់ខ្លួនអាចមានឥទ្ធិពលខ្លាំងណាស់ ទៅលើអស់អ្នកដែលមាន«ចិត្តគំនិតត្រឹមត្រូវឲ្យបានជីវិតដែលគ្មានទីបញ្ចប់»។—សកម្ម. ១៣:៤៨
ពីមុនយើងផ្ដោតលើការទន្ទេញចាំពាក្យផ្សាយ ហើយស្នើផ្ដល់សៀវភៅដល់ម្ចាស់ផ្ទះ។ ប៉ុន្តែឥឡូវ យើងត្រូវចេះសន្ទនាច្រើនជាងជាមួយនឹងម្ចាស់ផ្ទះ។ យើងចង់ឲ្យម្ចាស់ផ្ទះដឹងថាយើងស្រឡាញ់ពួកគេ ហេតុនេះយើងចង់និយាយអំពីសាច់រឿងដែលពួកគេចាប់អារម្មណ៍។ នេះតម្រូវឲ្យយើងចេះបត់បែន ហើយគិតយ៉ាងហ្មត់ចត់អំពីកង្វល់ និងចំណាប់អារម្មណ៍របស់បុគ្គលម្នាក់ៗ។ តើសៀវភៅស្ដើងនេះនឹងជួយយើងឲ្យធ្វើដូច្នេះយ៉ាងដូចម្ដេច?
សៀវភៅស្ដើងនេះមាន១២មេរៀន ហើយរៀបរាប់នូវគុណសម្បត្តិផ្សេងៗដែលយើងត្រូវមានដើម្បីបង្ហាញសេចក្ដីស្រឡាញ់ និងជួយមនុស្សឯទៀតឲ្យក្លាយជាអ្នកកាន់តាមគ្រិស្ត។ មេរៀននីមួយៗផ្អែកទៅលើគុណសម្បត្តិរបស់លោកយេស៊ូ ឬគ្រិស្តសាសនិកនៅសតវត្សរ៍ទី១ គឺជាគុណសម្បត្តិដែលពួកគាត់បានបង្ហាញក្នុងកិច្ចផ្សព្វផ្សាយ។ គោលដៅរបស់យើងមិនមែនទន្ទេញចាំពាក្យផ្សាយនោះទេ តែយើងស្វែងរកវិធីបង្ហាញសេចក្ដីស្រឡាញ់ដល់មនុស្សឯទៀត។ ពិតមែនថាគុណសម្បត្តិនីមួយៗគឺសំខាន់ក្នុងគ្រប់ផ្នែកនៃកិច្ចបម្រើផ្សាយ តែយើងនឹងគិតពិចារណាថាគុណសម្បត្តិណាគឺចាំបាច់ ជាពិសេសពេលចាប់ផ្ដើមសន្ទនា ពេលត្រឡប់ទៅជួប ឬពេលបង្រៀនគម្ពីរ។
កាលដែលបងប្អូនពិនិត្យមើលមេរៀននីមួយៗ សូមគិតឲ្យបានដិតដល់អំពីរបៀបដែលបងប្អូនអាចបង្ហាញគុណសម្បត្តិនោះ ពេលនិយាយជាមួយនឹងមនុស្សក្នុងតំបន់ដែលបងប្អូនរស់នៅ។ ចូរខំព្យាយាមស្រឡាញ់ព្រះយេហូវ៉ានិងមនុស្សឯទៀតឲ្យកាន់តែខ្លាំង ដោយសារសេចក្ដីស្រឡាញ់នឹងជួយបងប្អូនឲ្យសម្រេចគោលដៅក្នុងការជួយគេឲ្យក្លាយជាអ្នកកាន់តាមគ្រិស្ត។
យើងសប្បាយចិត្តណាស់ ដែលមានឯកសិទ្ធិពិសេសរួមធ្វើការជាមួយនឹងបងប្អូន។ (សេផ. ៣:៩) សូមឲ្យព្រះយេហូវ៉ាផ្ដល់ពរជាបរិបូរដល់បងប្អូន កាលដែលបងប្អូនបន្តស្រឡាញ់មនុស្សឯទៀត ហើយជួយពួកគេឲ្យក្លាយជាអ្នកកាន់តាមគ្រិស្ត!
ពីបងប្អូនរបស់អ្នក
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)