Jiphange Jetu Jakazola:

O henda yetu kwa Nzambi ni ku athu, ituswinisa o ‘kuya . . . ni kubhanga maxibulu ku akwá jixi joso, ni kwa batizala.’ (Mat. 28:​19, 20; Mál. 12:​28-31) O henda ya kidi yala ni nguzu yavulu. Se tukala ni henda yakidi, twandatena kukwatekesa yó “a fwamena kutambula o mwenyu wakalelaku.”—Ikalakalu 13:48.

M’ukulu twakexile mubhanga yoso phala kubhaka mu kilunji o izwelu itwandazwela mu sidivisu ya kuboka, twakexile we mubhanga yoso phala kubhana madivulu ku athu. Maji lelu twabhingi kubandekesa o uhete wetu wakuzwela ni athu. Twamesena kwidikisa henda ku athu mu kuzwela nau ima yawabhela ene. Kiki kilombolola kwila, kitutokala kudikwatenena ngo ku diba dimoxi, maji twatokala kuxinganeka ku ibhindamu ya muthu ni muthu. Kyebhi o kadivulu kaka kanda tukwatekesa kubhanga kiki?

O kadivulu kala ni 12 kya madisá andatulongesa idifwa itwatokala kukala nayu phala tutene kulondekesa henda ku athu ni kubhanga maxibulu. Kala disá dyatundu mu musoso wa Bibidya ulondekesa Jezú mba muboki wengi mu hama ya dyanga walondekesa kidifwa kiki mba kiná mu kuboka. Etu kitumesena kubhaka izwelu mu kilunji maji twamesena kusota maukexilu akulondekesa henda ku athu. Sumbala twabhindamena kukala ni idifwa yoso mu sidivisu yetu ya kuboka, twandadilonga kyebhi sayi ni idifwa yiyi twaibhindamena dingi mu kithangana kya kumateka kuzwela ni muthu, idifwa yakamukwa twaibhindamena mu kukunda dingi o muthu, o yakamukwa hanji twaibhindamena mu kulonga o Bibidya ku athu.

Mu kudilonga o madisá, xinganeka kyambote kyebhi ki utena kulondekesa o idifwa yiyi kyoso ki wandakala mu zwela ni athu mu dyembu dyé. Sota kukolesa o henda yé kwa Jihova ni ku athu. O henda yiyi, yandakukwatekesa kuswa o mbambe yé yakubhanga maxibulu.

Twaximana kyavulu o ujitu utwala nau wa kukalakala kumoxi n’eye. (Sof. 3:9) Jihova akubesowale kyavulu kyoso kiwandaya ni kuzol’o athu ni kubhanga maxibulu!