A biin-kweet baan-balum ni baan-bakaj:

Lukat lutudy naalw bwa Mawej ni bwa baat lwiitusaasak bwa ‘kuy . . kudy baat ba bis byoos bya ha bulab, kwiibaalabul bashaal biiyij ni kwiibabatiiz.’ (Mat. 28:19, 20; Mark 12:28-31) Lukat lutudy naalw bwa baat i lukasakan. Luteeteng micim ya aab boos bady “bilongolol bwa kuhet buumy bwa mwendeleel.”—Yil. 13:48.

Kal, twaakady twiimanyin teng ha kukwaat mishind ya kutang kwiisamb ni baat mu mut ni ha verseh yitwaakady naay. Bwa kaabaak tukaakaam kulengej mishind iitut ya kwiisamb ni baat. Tukaakaam kuleej neey tudy bakat bakwaabw ha twiibambambil myand yibasaasangej. Biin eeby biloolomb kwiikal habwiih bwa kufutulul mwiisamb bilondeshel muut woos utusaasambakeen nend. I mushind kaay wiikal Broshir oow mwa kwiitwambulwiish bwa kulong nook?

Broshir oow udy ni malongweesh 12 miikal mwa kwiitulongweesh biikadil bitudy ni bwa kwiikal naaby bwiitut kuleej lukat ni kwaalabul baat bwa bashaal biiyij. Dilongweesh dyoos i diimanyin ha ciikadil cyaakady Yeez eecy muut mukwaabw a mu siyekel a kuuhal balong mu mudimw a kudiilangan musah. Kiihacil kakiin ka kukwaat mu mut mishind ya kutang naay misambw, ki i ka kukaam mishind yitudy mwa kuleej lukat lwiitut bwa baat. Nang mudy ciikadil ni ciikadil cyoos ciikal ni buseeb mu mudimw wiitut a kudiilangan musah, twiiyiiy kutal mudy bilong kaahand mwa kwiitwambulwiish hatutaatang kwiisamb ni baat, hatwiibahiihingulwiilomw ni hatuloolongweesh muut Bibl.

Hanwendend ni kulong diilongweesh kaahand, lang bwa muwudy mwa kuleej ciikadil cidyobw baleebel mu diilongweesh aady hawiisaasamb ni baat ba ha cyaab ciwudy mushikacil. Long mwiibuh moos bwa kukashish lukat luwudy naalw bwa Yehow ni baat. Lukat, i lul ludy luhitok mishind kaay yoos ya kulongweesh, lukukwaakwanjok bwiibuh kukumbaj kiihacil kiibuh ka kwaalabul baat biiyij.

Twaanaan bikasakan dyaakatook ditam ditudy nady dya kukal neen mudimw haakaabumw. (Sef. 3:9) Tuloolomb Yehow bwa inufiil kis nun boos bwa munutuutungunuk ni kukat baat ni kwiibaalabul biiyij!