Mwet Lili Sacohk Nuhkewa:

Luhngse nuh sin God ac mwet uh oruh kuht in som nuh yurin mwet ac ‘oruh tuh elos in mwet tuhma lutlut, bacptaiselos.’ (Mt. 28:19, 20; Mark 12:28-31) Fin oasr yohrohsr kain in luhngse pwacye inge nuh sin mwet uh, kuht kuh in kahsruh mwet ‘suc suk’ God.—Hebrew 11:6.

In pacl somlah ah, kuht lohacng na in kaliyac mwe sramsram lasr uh ac in fihliyac mwe rit nuh yurin mwet uh. Ingena kuht enenuh in ahkwoye kuhiyacsr in sramsram nuh sin mwet. Kuht ahkkahlwemye luhngse ke kuht sramsramkihn ma ma elos luhngse in sramsramkihn. Kalmacn ma inge pa kuht in ahkolah in ikihl sramsram lasr ac lohacng ahkwoyac ke ma mwet uh nuhnkuh ac luhngse in sramsramkihn uh. Brochure se inge ac kuh in kahsre kuht fuhkah in oruh ma inge?

Oasr mwe lutlut 12 ke brochure se inge ma luti kuht ke ohiyac wowo ma kuht enenuh in ahkwoye tuh kuht in ahkkahlwemye luhngse ac orek mwet tuhma lutlut. Kais sie mwe lutlut tuhkuh ke ma suhmuhslah in Bible ma Jesus kuh sie pac mwet fahkwack pweng wo in pacl meet ah ahkkahlwemye ke sie ohiyac wowo nuhke orekma in luti uh. Finsrak wo lasr pa, in tiac kaliyac mwe sramsram lasr uh, a kuht in liye inkacnek kuht kuh in ahkkahlwemye luhngse nuh sin mwet uh. Finne ohiyac nuhkewa enenweyuck nuhke oakwuck nuhkewa ke orekma in luti lasr, kuht ac fah lutlutkihn lah fuhkah kuhtuh ohiyac arlacna enenweyuck ke pacl kuht muhtwacwacack in sramsram nuh sin mwet, ke kuht sifwil fohlohk, kuh oruh lutlut Bible nuh yurin mwet.

Ke kom lutlutkihn kais sie mwe lutlut, nuhnkuh ahkwoyac lah kom ac ahkkahlwemye fuhkah ohiyac se ke kom sramsram nuh sin mwet ke acn sum an. Srihke in ahkkweye luhngse lom nuh sin Jeova ac nuh sin mwet uh. Luhngse inge, ma yohk liki kuhtwena inkacnek in sramsram, ac fah kahsre kom in sun finsrak lom in orek mwet tuhma lutlut.

Kuht ahksacohkye kunohkohn na yohk in wi kowos kuhlwacnsap nuh sin God ke inse sefanna. (Zep. 3:9, BMK) Kuht puhruhe tuh Jeova elan ahkinsewowoye kowos na pwacye ke kowos tahfwelah na in luhngse mwet uh ac orek mwet tuhma lutlut!