Ku balongo ne banyenga:

Kutemwa Lesa ne bantu ko kwitulengela ‘kuya . . . na kufunjisha bantu ba mu bisaka byonse bya bantu kwikala ke baana ba bwanga, ne kwibabatizha.’ (Mat. 28:19, 20; Mako 12:28-31) Inge kine twatemwa bantu, kiketupeelela bingi kukwasha ‘baji na michima ya bukishinka ya kukeba bumi bwa myaka ne myaka.’​—Byu. 13:48.

Kala twatanga bingi muchima kulabijila bya kwisamba na bantu ne bya kusha mabuku. Pakuba aluno twafwainwa kuta muchima kuyuka bya kwisambanga na bantu. Twafwainwa kwisambanga na bantu pa bintu byo batemwa pa kuba’mba bayuke’mba twibatemwa. Akino kibena kulumbulu­la’mba twafwainwa kupimpula pimpulanga mwisambo ne kwisamba na muntu kwesakana na makatazho o abena kupitamo ne bintu byo atemwa. Pano uno buloshuwa, usakwitukwasha byepi kusapwilanga bulongo?

Mu uno buloshuwa muji mitwe 12 ibena kwamba pa byubilo byo twafwainwa kwikala nabyo pa kuba’mba tutemwe bantu ne kwibakwasha kwikala baana ba bwanga. Mutwe yense waimena pa jishimikila ja mu Baibolo jaamba pa kyubilo kyamwesheshe Yesu nangwa bena Kilishitu batanshi mu mwingilo wa kusapwila. Mulanguluko mwine kechi wa kulabijila ku mutwe bya kwisamba na bantu ne. Pakuba ke kwitukwasha kumonapo mashinda mwa kumweshesha byo twatemwa bantu. Ibyo kuba’mba kyubilo kyonse kyanema mu mwingilo wetu. Onkao mambo, tusakwisamba pa byubilo bimo kikatakata byo twafwainwa kwikala nabyo pa kutendeka kwisamba na bantu, pa kubwelako nangwa pa kufunjisha bantu Baibolo.

Pa kufunjisha muntu pa mutwe yense, langulukaingapo bulongo byo mwafwainwa kumwesha butemwe pa kusapwila ku bantu bekala mu mpunzha yenu. Ibikaiko kutemwa bingi Yehoba ne bantu. Inge mwauba bino, kisakukemupeelela bingi kukwasha bantu kwikala baana ba bwanga.

Tubena kwimusanchila bingi kwingijila pamo nenu mu uno mwingilo wanema bingi. (Zefwa. 3:9) Onkao mambo, Yehoba emupeshe byo musakutwajijila kutemwa bantu ne kwibakwasha kwikala baana ba bwanga.