Lawosɛ Puaapiliaa a Ndepiliaa:

Kaala naŋ nɔ le Mɛlɛka a waŋnda chieeya wo nyindu naa ni le miŋ ‘kuɛ, miŋ siiŋguu nda buɛiya, nduyɛ miŋ yiŋ nda.’ (Maa. 28:​19, 20; Maki 12:​28-31) Kaala kpeekpeiyo nɔ kpaayaa. Mbo pilaŋ kɔlta “wanaa . . . nɔ yeemɛi le chɛlɔɔ tonya yɔŋgu yoomu fafɛɛŋndo wo wa.”—Walta. 13:48.

O wɔsiŋ hiou woŋ niŋ, miŋ kindiŋ le nyɛ naŋ nɔ le dimioo o yooŋgu kɛndɔɔ niŋndo poonyiaa a sondoo miŋgioo lechoo le ndu loonɔŋndo, vɛlɛ a nyɛ naŋ nɔ le dimioo le yaulaŋ yooŋgoo wo. Kɛ suŋ suŋ niŋ, ŋ nɔ miŋ tosa wallo kalaŋ le nɛila cheleŋ soliŋndo kpeku le chaa suɛi o waŋnda lo. Te ŋ yeema pɛ miŋ chɔm waŋnda kaalaa, mɛɛ miŋ soo a sɔɔŋ nda nɔ yeemɛi leniŋ ndoŋ. Ŋ nɔ miŋ wa fɛɛsɛŋ, nduyɛ miŋ wa yekeŋ le sinaa nyɛ wana o wana nɔ yeemɛi leniŋndo. Vɛɛ buluchiɔɔ wo hoo cho yɛ naa mala le keŋ tosaa?

Buluchiɔɔ wo hoo nɔ sɔɔŋ lebolloŋ 12. I kɛ kɛ soo a suliŋ naŋ nɔ miŋ nɔ le waŋnda kaalaa chɔmndo nduyɛ miŋ siiŋguu nda buɛiya wo okɔɔ. Suɛi lebolii kɛ kɛ soo a mɛɛ Chiisu, ɔɔ wana dimiaa yooŋgu kɛndɛ cheleŋ o wɔsiŋ kɛmɛ tasoŋ niŋ chɔm suliŋ sɔvɛ sɔviɔɔ o yooŋgu kɛndɔɔ dimioo niŋ yɛ. Yɛɛ cho yɛ kpeleŋ naa suŋ suŋ? Ŋ nɔ miŋ nuuviaa nɛilaŋ le waŋnda kaalaa chɔmndo, kɛ o cho lɛ le nyɛ naŋ nɔ le dimioo wo loonɔŋndo le. I cho tonya maa mi suliŋ kɛ kɛ mala naa o yooŋgu kɛndɔɔ dimioo niŋ. Kɛ ŋ cho pɛɛku a mɛɛ suliŋndaŋ lapum la yeemaŋ tau le baltaŋ kandɔɔ, miiŋgu makɔɔ tosaa, a waŋnda Baabuiyo pɛɛkoo yɛ.

Te a wa pɛ suɛi lebolii kɛ kɛ pɛɛkoo, yiyaŋ yiŋgoloŋ a mɛɛ ŋ duau suliŋndo opilɛ o wali niŋ yɛ te a wa pɛ baltaŋ dɔwɔɔ a waŋnda o fondaŋ ŋ cho wo. Kindi kaala ŋ nɔ le Chɛhowa a waŋnda wo poŋ. Kaala koŋ cho num mala ni ma komal kpeleŋ numndo le waŋnda siiŋguu wo buɛiyaa Chiisuaa.

Ŋ nɔ bɔɔ balikaa melaa le dikeŋnaŋ bɛndu naŋ nɔ le wallo tosaa latulu a numndo. (Sɛfa. 3:9) Maa Chɛhowa dɔu num sala le ma hiou lachi a waŋnda kaalaa, nduyɛ ma siiŋguu nda buɛiya!