Kovanavazinyetu:

Eharo lyetu lyokuhara Karunga novantu yilyo ali tu tumangeda ‘tu ze konomuhoko nadinye tu ka tulise po varongwa noku ka va kuhwa.’ (Mat. 28:19, 20; Mar. 12:28-31) Eharo kwa kara nononkondo. Nsene tu hara vantu, ose ngatu vatera ‘ava va kara nonomutjima donongwa va ya kare vapuli.’—Yirug. 13:48.

Nare, ose ngatu liwapaikire komeho zosiruwo eyi natu ka zogera novantu noku ka va sigira yimbapiratjangwa. Ngesi twa hepa kuwapukurura nkedi zetu zokuzogera novantu. Tuna hara kuvalikida eharo pokuzogera nawo yirongwa eyi va hara. Eyi kutanta asi kuzogera nomuntu kuliza noukaro, nosinka esi ana kara naso ntani neyi ga hara. Ngapi omu mbapira ezi nazi tu vatera?

Mbapira ezi kwa kara mo yirongwa 12 eyi ya tumbura yikara eyi twa hepa kutunga po yipo tu likide eharo nokutulisa po varongwa. Nkenye sirongwa kwa si gusa mosihorokwa somoBibeli omu Jesus ndi Vakriste wokuhova va likidire sikara songandi mokuzuvhisa. Sitambo setu kuna kara asi tu papare nonkedi omu natu likida eharo kovantu nye kapisi sokukwata momutwe eyi natu ka zogera nawo. Mokumona asi nkenye sikara twa si hepa mokuzuvhisa, natu ka zogera yikara yongandi eyi twa hepa pokutameka nzogera novantu nopokurugana matengwiroko ntani malirongo goBibeli.

Ngomu no ka konakona nkenye sirongwa, gazadara ko omu no vhura kulikida yikara oyo apa no zogera novantu womomukunda. Hetekera ko kunkondopeka eharo lyoge kwaJehova nokovantu. Eharo lyangoso, ngali ku vatera o sikise mo sitambo soge sokutulisa po varongwa.

Tatu pandura kositumbukira esi sosinene sokurugana kumwe nove. (Sef. 3:9) Ngano Jehova a ku tungike ngomu ono kutwikira kuhara vantu noku tulisa po varongwa!