Nkanda wa Selo Yambuta
Kwa Mpangi Zeto Zanzolwa
O zola muna Nzambi ye muna wantu kukutufilanga mu ‘kwenda yo kitula wantu a zula yawonso se alongoki yo kubavuba.’ (Mat. 28:19, 20; Maku 12:28-31) O zola kwakieleka kuvuidi o nkuma. O zola kwaku kulenda simba e ntima mia awana bena “kikilu ye luzolo lwa vua moyo a mvu ya mvu.”—Mav. 13:48.
Muna mvu miavioka twasianga kaka e sungididi muna nsongesela twakubikanga yo kaya e nkanda. Owau tuvanganga mawonso mu tomesa e ndekwa zeto za mokena ye akaka. Tuzolele songa o zola kwa akaka muna kubazayisa mana bavuidi o mfunu. Ediadi disongele vo tufwete sobanga e ndekwa zeto yo sia e sungididi muna mambu mana konso muntu ketokanenanga yo yangalela. Aweyi o nkanda wau ulenda kutusadisila mu vanga wo?
O nkanda wau una ye malongi 12 mesonganga fu tuvuidi o mfunu muna songa o zola yo kitula wantu se alongoki. Konso longi dibongelo muna lusansu lumosi lwa Bibila lusonganga una Yesu ye ateleki ankaka a tandu kiantete basongela fu kimosi muna salu kia umbangi. E kani dia lusansu lwalu ke lunda nsongesela muna ntu ko, kansi muna kutusadisa mu zaya e mpila tulenda songela o zola kwa wantu. Kana una vo konso fu mfunu kina muna salu kieto kia umbangi, tubadika una e fu yankaka inina o mfunu vava tumokenanga yo muntu mu nkumbu antete, vava tuvutukanga kingula yovo vava tulongokanga e Bibila yo muntu.
Vava o longoka konso longi, yindula una olenda songela e fu kiyikilu muna longi vava omokena yo wantu muna zunga kiaku. Vanga mawonso muna wokesa o zola kwaku muna Yave yo wantu. O zola kwaku kukusadisa mu lungisa e kani diaku dia kitula wantu se alongoki.
Tuyangalelanga elau tuna diau dia sala yeno entwadi. (Sef. 3:9) Yambula Yave kakwamanana kunusambula ekolo nukwamanananga zola wantu yo kitula wantu se alongoki!
Mpangi zeno,
Buka kia Selo Yambuta ya Mbangi za Yave