Haꞈ ve awˬ viˉ awˬ nyi˗oˬ:

Ngaˬ hui lehˬ Gʼuiˬ sha leh chaw yaˇ htaꞈ haꞈ ve pa taw, ‘chaw ceuˬ hkʼa peu˗eˬ awˬ laꞈ gʼawˇ hpehꞈ la tuˬ leh yawˇ hui htaꞈ Baˆtiˆsaˬ piˇ’ tuˬ ca te ve yoˬ. (Maꞈhtehˍ 28:19, 20; Maˍkuˆ 12:28-31) Haꞈ pehnˇ ve chi hkʼe ve ngaˬ hui cawˬ ve kʼo, ‘Gʼuiˬ sha htaꞈ ca ve chaw hui’ htaꞈ ga piˇ gʼa ve yoˬ.—Heˍbrehˇ 11:6.

Oˇ htaˇ kʼo, ngaˬ hui tawˇ yaw tuˬ awˬ hkʼaˇ teˇ ceuˬ ceh tiˉ kʼoˆ leh liꞈ kʼoˆ piˇ ve yoˬ. Yaꞈ hkʼaˇ, chi teˇ hkui kʼo, ngaˬ hui awˬ nu ve chaw geh tawˇ hkʼa dehꞈ yaw daꞈ gʼa tuˬ te jawˬ ve yoˬ. Ngaˬ hui chaw yaˇ htaꞈ haꞈ ve tehꞈ hpeuꞈ maw piˇ ve lehˬ, yawˇ hui nyi ma pfuhˇ tuˬ awˬ lawn yaw piˇ ve yoˬ. Chi kʼoˆ gaˇ ve lehˬ, awˬ nu ve chaw aˬ htoꞈ ma awˬ lawn htaꞈ dawˇ haˍ ve, leh yawˇ aˬ htoꞈ ma ve htaꞈ a yeˇ yuˬ ve ngaˬ hui hkʼa dehꞈ gʼa dawˇ nyi piˇ leh awˬ lawn oˇ ve htaꞈ yaw daꞈ ve yoˬ. Chi hkʼe te gʼa tuˬ, liꞈ kʼoˆ chi teˇ kʼoˆ ngaˬ hui htaꞈ hkʼaˬ hkʼe ga laˇ gʼa tuˬ le?

Liꞈ kʼoˆ chi ve 12 lawn cawˬ ve yoˬ. Awˬ lawn chi teˇ hpaˍ lehˬ, ngaˬ hui haꞈ pehnˇ ve tehꞈ hpeuꞈ maw piˇ leh shu awˬ laꞈ gʼawˇ hpehꞈ la tuˬ maˍ piˇ tuˬ awˬ pon, ngaˬ hui gʼa cawˬ cawˇ ve te hkʼaˇ dawˇ hkʼaˇ teˇ hpaˍ htaꞈ kʼoˆ taˍ ve yoˬ. Yeˍsuˆ maˇ heˆ leh awˉ lawˉ peuˇ ha lehˬ ve bon hkawˇ maˍ ve awˬ nu ve chaw lehˬ, yawˇ hui Gʼuiˬ sha ve kanˉ te htaˇ, te hkʼaˇ dawˇ hkʼaˇ teˇ ceuˬ ceuˬ hkʼaˬ hkʼe hpeuꞈ maw laˇ ve, teˇ lawn leh teˇ lawn htaꞈ kʼoˆ taˍ ve yoˬ. Ngaˬ hui dawˇ teh taˍ ve lehˬ, tawˇ yaw tuˬ awˬ hkʼaˇ teˇ ceuˬ ceh tiˉ kʼoˆ tuˬ ve maˇ heˆ. Yaꞈ hkʼaˇ, chaw yaˇ htaꞈ haꞈ ve tehꞈ hpeuꞈ maw piˇ tuˬ awˬ hkʼaˇ ca ve yoˬ. Ngaˬ hui te hkʼaˇ dawˇ hkʼaˇ chi ve teˇ hpaˍ hkʼa peu˗eˬ gʼa cawˬ cawˇ ve htawˇ, te hkʼaˇ dawˇ hkʼaˇ teˇ ceuˬ leh teˇ ceuˬ lehˬ, ngaˬ hui tawˇ tanˬ yaw daꞈ htaˇ maˇ kʼoˆ, ca kʼawꞈ guiˇ˗e htaˇ maˇ kʼoˆ, Liꞈ hpu maˍ piˇ htaˇ maˇ kʼoˆ, hkʼaˬ hkʼe ga laˇ gʼa ve htaꞈ teˇ geh henˇ tuˬ yoˬ.

Awˬ lawn teˇ hpaˍ htaꞈ henˇ ve teˇ yanˇ, ngaˬ hui hto toˇ kuiˬ lo ve chaw htaꞈ yaw daꞈ htaˇ, te hkʼaˇ dawˇ hkʼaˇ chi ve teˇ hpaˍ hkʼaˬ hkʼe hpeuꞈ maw piˇ gʼa ve hkʼa dehꞈ dawˇ nyi sheˍ. Yaˬhoˉvaˬ leh chaw yaˇ htaꞈ leuˉ leh haꞈ sheˍ. Haꞈ pehnˇ ve chi ve lehˬ, te puiˉ te hpehꞈ ve aꞈ kehˉ a yeˇ uiˍ jaˇ. Awˬ lawn kʼo, haꞈ pehnˇ ve lehˬ shu awˬ laꞈ gʼawˇ hpehꞈ la tuˬ nawˬ ga piˇ gʼa ve yoˬ.

Ngaˬ hui nawˬ geh kanˉ teˇ geh gʼa te ve ha lehˬ jaˇ. (Zeˍhpaˍniˆ 3:9) Nawˬ chaw yaˇ htaꞈ hkʼaˬ htaˆ kaꞈ haꞈ leh yawˇ hui awˬ laꞈ gʼawˇ hpehꞈ la tuˬ maˍ piˇ ve htaꞈ Yaˬhoˉvaˬ awˬ bon naꞈ piˇ sheˍ!