ຈົດໝາຍຈາກຄະນະກຳມະການປົກຄອງ
ພີ່ນ້ອງທີ່ຮັກ:
ຄວາມຮັກທີ່ມີຕໍ່ພະເຈົ້າແລະຜູ້ຄົນກະຕຸ້ນໃຫ້ເຮົາ “ໄປຫາຄົນທຸກຊາດແລະສອນເຂົາເຈົ້າໃຫ້ເຂົ້າມາເປັນລູກສິດ ໃຫ້ເຂົາເຈົ້າຮັບບັບເຕມາ.” (ມທ. 28:19, 20; ມຣກ. 12:28-31) ຄວາມຮັກທີ່ບໍ່ເຫັນແກ່ໂຕມີພະລັງຫຼາຍ. ຄວາມຮັກແບບນີ້ຈະປະທັບໃຈຄົນທີ່ “ເຕັມໃຈຕອບຮັບຄວາມຈິງທີ່ເຮັດໃຫ້ໄດ້ຊີວິດຕະຫຼອດໄປ.”—ກຈກ. 13:48
ແຕ່ກີ້ ເຮົາມັກເນັ້ນທີ່ການຈື່ຈຳວິທີປະກາດແລະການແຈກສິ່ງພິມ. ແຕ່ຕອນນີ້ເຮົາຕ້ອງຝຶກເວົ້າລົມກັບຜູ້ຄົນໃຫ້ເກັ່ງຂຶ້ນ. ເຮົາຢາກສະແດງຄວາມຮັກຕໍ່ຄົນອື່ນໂດຍການເວົ້າເຖິງເລື່ອງທີ່ເຂົາເຈົ້າສົນໃຈ. ນີ້ໝາຍຄວາມວ່າເຮົາຕ້ອງຄິດດີໆວ່າຄົນທີ່ເຮົາລົມນຳເປັນຫ່ວງແລະສົນໃຈເລື່ອງຫຍັງຢູ່ ແລະພ້ອມປັບປ່ຽນເລື່ອງທີ່ເຮົາເວົ້າ. ຈຸນລະສານນີ້ຈະຊ່ວຍເຮົາໄດ້ແນວໃດ?
ຈຸນລະສານນີ້ມີ 12 ບົດຮຽນທີ່ສອນເຮົາກ່ຽວກັບຄຸນລັກສະນະຕ່າງໆທີ່ເຮົາຕ້ອງມີເພື່ອຈະສະແດງຄວາມຮັກແລະສອນຄົນໃຫ້ເປັນລູກສິດ. ແຕ່ລະບົດຮຽນອ້າງອີງຈາກເລື່ອງລາວໃນຄຳພີໄບເບິນທີ່ເນັ້ນຄຸນລັກສະນະທີ່ພະເຢຊູຫຼືຄລິດສະຕຽນຍຸກທຳອິດສະແດງໃຫ້ເຫັນໃນວຽກຮັບໃຊ້. ເປົ້າໝາຍບໍ່ແມ່ນເພື່ອຈື່ວິທີປະກາດ ແຕ່ເພື່ອຫາວິທີສະແດງຄວາມຮັກຕໍ່ຜູ້ຄົນ. ເຖິງວ່າຄຸນລັກສະນະແຕ່ລະຢ່າງຈຳເປັນຕ້ອງມີໃນການເຮັດວຽກຮັບໃຊ້ ແຕ່ເຮົາຈະມາເບິ່ງວ່າຄຸນລັກສະນະບາງຢ່າງຈຳເປັນຕ້ອງມີເປັນພິເສດແນວໃດເມື່ອເລີ່ມລົມ ກັບໄປຢາມ ຫຼືນຳການສຶກສາຄຳພີໄບເບິນ.
ຕອນທີ່ເຈົ້າເບິ່ງບົດຮຽນແຕ່ລະບົດ ໃຫ້ຄິດດີໆກ່ຽວກັບວິທີທີ່ເຈົ້າຈະສະແດງຄຸນລັກສະນະເຫຼົ່ານີ້ເມື່ອເວົ້າກັບຜູ້ຄົນໃນເຂດປະກາດ. ພະຍາຍາມຮັກພະເຢໂຫວາແລະຜູ້ຄົນໃຫ້ຫຼາຍຂຶ້ນ. ຄວາມຮັກສຳຄັນກວ່າທັກສະຫຼືຄວາມສາມາດທີ່ເຈົ້າມີ ຍ້ອນຄວາມຮັກຈະຊ່ວຍເຈົ້າໃຫ້ສອນຄົນໃຫ້ເປັນລູກສິດ.
ເຮົາຖືວ່າເປັນສິດທິພິເສດຫຼາຍແທ້ໆທີ່ໄດ້ເຮັດວຽກຄຽງບ່າຄຽງໄຫຼ່ກັບເຈົ້າ. (ຊຟຢ. 3:9) ຂໍພະເຢໂຫວາອວຍພອນເຈົ້າເມື່ອເຈົ້າຮັກຄົນອື່ນແລະສອນຄົນໃຫ້ເປັນລູກສິດຕໍ່ໄປ!
ພີ່ນ້ອງຂອງເຈົ້າ
ຄະນະກຳມະການປົກຄອງຂອງພະຍານພະເຢໂຫວາ