Ge Ɣaa Yɔwɔ̃itiɛ, Wana:

Wõilai e de ya Gala faa ma ta numaa, towa ya kɛ da ‘li . . . diɛ zii pɛ kala bo diɛ bataize ɣɛ ga tiɛ.’ (Maf. 28:19, 20; Maki 12:28-31) Wõilai e de ya, gaa-ɓaavɛ. Towa ya kɛ “niitiɛ nɛpɛ zɛʋui nii kwɛ̃ɛ gɛ lɛ ba é te ʋaa ma” te yee zei Gala goi wu—Te Ɣɛɛ Ʋaitiɛ 13:48.

Wɔlɔ, dɔ ɣizɛ fai ta zu de bo numaa ma diɛ kɔlɔ ʋe te ya. Kɛ niizu niitiɛ da bo numaa ma maa nɛɛ diɛ pele ɣaa-ziɛ ga e va. De wõini de dɛ ga wõila ɣa de ya numaa ʋaa ma da ɣɛna yɛpɛzu e vile zɛpɛ wũgi niitiɛ va te wõini la. Na zu-wulo-zu ɣa ga, da ʋai mɛlɛ ɓaa na ɣa ɣɛɛna diɛ ɣi-gaa-ziɛ ɓɔɔ ga pagɔ niitiɛ ma te wõini la, ta niitiɛ tɛ lɛ wõini la. Bolosiɛi nii ɣa ʋaazu ɓɔsu de va ɣɛ le ga de na ɣɛ?

Kalabo 12 tiɛ te bolosiɛi nii zu ta yɛpɛzu e vile tuɓo-vele taniga va. Da ɣaa ɓaana tuɓo-velei niitiɛ te ɣɛ de ya ta ɓɔ de va de wõi ga numaa diɛ te ɣalabo. Faitiɛ Ziizɛ ɓɔga Gala goo wo bea taniga te kɛɛni wɔlɔ-wɔlɔi zu, tiɛ ka kalabogi niitiɛ vilegɛi ba. Tɔ na ga e ɓɔ de va de kwɛ̃ɛ velei da wõila lɛɛ la numaa ʋaa ma, ɛ lɛ ga de ɣizɛ fai ta zu nɔ de bo te ma. Velei ɓalaa tuɓo-velei niitiɛ ta ɓɔ la de va Gala goo wotii zu, da vaazu maa wolizu velei te taniga ta ɓɔ la de va ga de zɛpɛi lɔɔ-zei, de li wulu numaa wɔ ɔɔ da ɣɛna Gala Kɔlɔi lɛɛzu ga tiɛ.

Ya ɣɛna kalabogi niitiɛ maa wolizu, kwɛ̃ɛ velei ya tuɓo-velei niitiɛ lɛɛ la ani ya ɣɛna Gala goo wo suvɛ. Ɣaa-ɓaa e ya wõilai zu-ɓaa Jehova ʋaa ma e vɛɛ numaa va. Wõilai levegɛ faa pɛ ba, tɔ vaazu ɓɔsu e va ga e numaa ɣalabo.

Ge wuuzu nɛɛvɛ ga wo vɛɛ ge va a de tii ɣɛ kii-ma. (Zeph. 3:9) Ɓɛ Jehova tuuyiɛ loo wo ma wa ɣɛna dɛɛzu ga wõila ɣa wo ya numaa ʋaa ma wiɛ te ɣalabo!