Mizwale ni Likaizeli Babalatiwa:

Kulata Mulimu ni batu kulususueza ‘kuya ni kuluta batu ba macaba kaufela kuba balutiwa, kubakolobeza.’ (Mat. 28:19, 20; Mare. 12:28-31) Lilato sakata linani maata. Haiba lubonisa lilato lelicwalo, litaba zelubulela likafita kwa lipilu za batu “ba lipilu zende bababata bupilo bobusa feli.”—Lik. 13:48.

Kwamulaho, neluisanga hahulu pilu kwa kupeta litaba za kuambola ni batu ni kubasiyela lihatiso. Kono cwale luswanela kuekeza kwa buikoneli bwaluna bwa kuambola ni batu. Lukona kubonisa babañwi lilato ka kuambola ni bona litaba zebatabela. Kuli lueze cwalo, lutokwa kucinca-cinca mikutalezo yaluna ni kunyakisisa ka tokomelo zebilaeza mutu yeluambola ni yena ni zatabela. Broshuwa ye ika lutusa cwañi kueza cwalo?

Broshuwa ye inani lituto ze 12 zebonisa tulemeno tolutokwa kuba ni tona kuli lubonise batu lilato ni kubaluta kuba balutiwa. Tuto ni tuto itomile fa likande leliñwi la mwa Bibele lelibonisa mo Jesu kamba mukutazi yomuñwi wa mwa linako za baapositola naaboniselize kalemeno kakañwi mwa bukombwa. Lituto ze halisika lukisezwa kulutusa kupeta litaba zeluka bulela kwa batu, kono lilukiselizwe kulutusa kuziba linzila zelukona kubonisa ka zona batu lilato. Nihaike kuli lutokwa kubonisa tulemeno to mwa likalulo kaufela za bukombwa bwaluna, lukanyakisisa mo tulemeno totuñwi sihulu tukona kulutuseza halukalisa lipuisano, halueza misipili ya makutisezo, kamba kuzamaisa lituto za Bibele.

Hamunze munyakisisa tuto ni tuto, munahanisise momukona kuboniseza kalemeno kakabulezwi mwa tuto yeo hamuambola ni batu babapila mwa sibaka semukutaleza ku sona. Mueze momukonela kaufela kutiisa lilato lamina ku Jehova ni kwa batu. Lilato leo lika mitusa hahulu kupeta sikonkwani sa kuluta batu kuba balutiwa kufita hane mukaitusisa mukutalezo omuñwi.

Luitebuha tohonolo yetuna yelunani yona ya kuswalisana ni mina mwa musebezi wo. (Zef. 3:9) Haike Jehova amifuyaule hahulu hamunze muzwelapili kulata batu ni kubaluta kuba balutiwa.