Batutu ne Bakaka Baswe:

Buswe botusenswe Leza ne bantu bwitutononanga ‘twende tukalonge bana ba bwanga mu bantu ba ku mizo yonso, ne kwibabatyija.’ (Mat. 28:19, 20; Mako 12:28-31) Buswe bwampikwa kwisakila budi na bukomo. Bubwanya kutenga mityima ya boba “badi na mutyima muyampe wa kukamona būmi bwa nyeke.”—Bil. 13:48.

Mafuku kunyuma, twadi tutele mutyima bininge ku kukwatyila misapwilo kampanda ku mutwe ne kupāna mabuku. Inoko pano tunenwe kulonga bukomo bwa kulumbulula bwino bwetu bwa kwisamba na bantu. Tusakanga kulombola buswe botusenswe bantu na kwisambila pa myanda yobatele’ko mutyima. Kino kishintulula’mba tunenwe kwikala bantu bapēlelwa kushinta ne babandaula na katentekeji makambakano a muntu ne muntu ne byobya byatele’ko mutyima. Le uno boloshile uketukwasha namani tufikile’po?

Uno boloshile udi na bifundwa 12 bīsambila pa ngikadila yotunenwe kwikala nayo pa kulombola buswe ne kulonga bana ba bwanga. Kifundwa ne kifundwa kīmanine pa nsekununi kampanda ya mu Bible, mwine mwālombwele Yesu nansha musapudi mukwabo wa mu myaka katwa kabajinji, ngikadila kampanda mu busapudi. Kitungo ke kya kukwatyilapo ku mutwe musapwilo kabidye, inoko i kya kukimba’ko miswelo ya kulombola’mo buswe botusenswe bantu. Nansha byotusakilwa ino ngikadila yonso mu miswelo yetu yonso ya busapudi, tusa kumona ngikadila kampanda moikadile ya mvubu, nakampata potushilula mīsambo, potulonga kujokela’mo, ne potwendeja bifundwa.

Pomubandaula kifundwa ne kifundwa, langulukilai na katentekeji pa muswelo omubwanya kulombola ngikadila’ya kitatyi kyomwisamba na bantu ba mu wenu mwaba. Longai bukomo bwa kuningija buswe bomusenswe Yehova ne bantu. Kutabuka manwa o-onso, buno buswe bukemukwasha mufikile pa kitungo kya kulonga bana ba bwanga.

Tufwija’ko bininge pa dyese dikatampe dyotudi nadyo dya kwingila nenu kipuji na kipuji. (Zef. 3:9) Tulomba Yehova emwesele bininge pomwendelela kusanswa bantu ne kulonga bana ba bwanga!