Ndsʼe kao tichja:

Nga tsjoachaa je Niná kʼoa kao je chjota kui xi basenkaoná nga nitjosoán kjoatéxoma xi tso: “Kuinga tangínsíño, kʼoa chjotana tikao je chjota xi tjín ngakjijnda naxinandá. Cha̱nisʼenngindáo” (Mat. 28:​19, 20 TNM; Mar. 12:​28-31). Nga bakolee kjoatsjoacha je chjota nʼio binyakao, je xi mele nga sʼe̱le “kjoabijnachon ngantsjai” ñaki bichókajin ni̱ma̱le kʼianga ʼmiyalee (Hech. 13:48).

Ngasʼa toxá bationdañá joʼmilee chjota nga chjakaonajmiá kʼoa nga bʼailee xo̱n xi nichjén. Tonga ndʼai tjínnele nga koa̱nná josʼin chja̱kaonajmiá je chjota. Kjoatsjoacha bakolee je chjota kʼianga kui chjakaonajmíñá jmeni xi mandosinle. Kjaʼaí kjaʼaí xi mandosinle nga jngó jngó chjota, kuinga machjénsíni nga kui chja̱kaoñá jmeni xi mele skoe̱, nga kuenta sʼiaan jmeni xi mandosinle kʼoa jmeni xi makjáojinle. Xo̱n jebi kui xá kitjoni nga koasenkaoná josʼin chja̱kaonajmiá je chjota.

Folleto jebi 12 kjoaʼmiya faʼaitʼa xi koasenkaoná nga koakoá kjoatsjoacha ánni nga chjotale Cristo katamani je chjota. Nga jngó jngó kjoaʼmiya kui tsoya jmeni xi kisʼin nga kitsoya je Jesús kʼoa tsa jngo chjotale Cristo xi tsakʼejna nichxin kjoatse. Ndʼaibi ali tsa tikuijin xi meniná nga tokʼoéjintokoán josʼin chja̱kaonajmiá je chjota, kui xi mená nga koakolee nga tsjoachaa. Ningalani machjénná ngayeje jmeni xi faʼaitʼa folleto jebi nga ʼmiyasoán, tonga tjínkʼa xi kʼia koa̱nchjénná nga chja̱kaonajmiá chjota, nga kjuinchón ijngokʼalee kʼoa nga kʼoailee estudio.

Kʼianga chótʼayai nga jngó jngó kjoaʼmiya tikjaʼaitsjain jósʼin si̱chjáin jmeni xi faʼaitʼa kʼianga kʼuínyalai chjota xi tjín ya ʼndeli. Tsa tsjoachaa je Jeobá kʼoa tsa tsjoachaa je chjota kui xi ngisa chjíle tikʼoajinni tsa tokʼoéjintokoán jokʼuínlee. Kʼoénelee yaoná nga tsjoacha katamaa je chjota. Tsa kʼoasʼiaan kui xi koasenkaoná nga chjotatjenngile Cristo koa̱n.

Tse kjoanda tjínná nga ñatjen tinixá ngatsʼiaa (Sof. 3:9). Je Jeobá katasíchikontʼainno nga bʼenelao yaono nga ʼmiyalao chjota.