Bandolome na Bandokazi:

Kuzema Njambi na banu kukatushongangeya ‘tuye ku banu ba ku mafuti oshe na kubapwisa bandongesi na kubambwitika.’ (Mate 28:19, 20; Maki 12:28-31) Cizemo ca busunga cakala na nzili. Casa kweta ku bimbunge bya banu baje bali na “bimbunge byabibwa bya kushaka kuyoya myaka yoshe.”—Bili 13:48.

Kunima twakele manene mbunge ku kwanuka bingila bya kwendekelamo na kuseza mabulu, oloni hano tunapande kulifwita kubwezelela ku butongwe bwetu bwa kwambulula omwo tushangumuka kusimutwiya na banu. Tushaka kumwesa cizemo ku banu ha kusimutwiya nabo byuma bije bibeta ku mbunge. Oku kulumbununa ngwabo tunapande kutengulula-tengululako bingila bya kwambulwilamo na kuzibuka byuma byasa kweta ku mbunge ya munu na munu. Aka kalibulu katukwasa bati tulinge ngoco?

Omu mu kalibulu muli bilongesa 12 bije bimwesa bifwa bitunapande kukala nabyo mangana tumwese banu cizemo na kubapwisa bandongesi. Cilongesa na cilongesa cinemana ha ñanda imo ya mu Mbimbiliya ije imwesa Yesu nambe muka-kwambulula umo wa mu simbu ya tupositolo mwamweselele oco cifwa mu cipangi ca kwambulula. Cilengo cetu keti ca kukwata bingila bya kwendekelamo, oloni tushaka kuwana bingila bya kumweselamo cizemo ku banu. Bifwa byoshe binapu bya seho mu cipangi ca kwambulula, oloni tusimutwiya mubitukwasela bifwa bimo maneneni nga tushaka kushangumuka kusimutwiya na banu na kulinga mangenzi a kwilukila na kutwamenena bilongesa bya Mbimbiliya.

Omwo mulilongesa cilongesa cimo na cimo, singanyekeseseni mumwasa kumwesela oco cifwa nga musimutwiya na banu mu citingitingi ceni. Lingeni mwoshe mumwasela mangana muzeme manene Yehova na banu. Eci cizemo cimikwasa mwete ha cilengo ceni ca kupwisa banu bandongesi.

Twabezika manene kupangela hamolika neni. (Zefa 3:9) Tulomba ngwetu Yehova amibezikise omwo mutwalelelaho kuzema banu na kubapwisa bandongesi!