Mayamunna ni mayanuunu:

Unfenta wihu Nluku ni waafenta wihu atthu unaanikurumica ‘urwaa, ni waapanka eetthuci atthu olapo cotheene, naapattisaka.’ (Mat. 28:19, 20; Mark. 12:28-31) Waafenta atthu weekhweeli uhaana ikuru. Nwo ufenta nwo unawaavara nrima atthu ‘anoonihera sana-saana upheela ukumi woohimala.’—Mite. 13:48.

Khalayi, hiiva naanawiikurumica ukawa ilivuru ni uhela mmuru itthu ninrweehu wuuluma wuulalyeerani. Masi vano, nihaana nirukunusaka mananna ninwoopaneehu mwaha atthu wuulalyeerani. Nimpheela uwoonihera atthwaayo wiira ninawaafenta; ni ninhala uwoonihera iyo nuulumaka citthu ayova cinoonaaya ukhala cofayita. Iyo maanaaya wiira nimpheela wiikurumica wuuluma citthu cinaakhaliha nimasukhuli atthwaayo ni cinhala waavara nrima. Manannani ila ibroxureela cinhalaaya unikavihera upanka commo?

Ila ibroxureela ihaana myaha 12 cinthoonyera makhalelo anlamuliyeehu ukhalana wiira nithoonyere nifento ni waapanka eetthuci. Khula mwaha wo ila ibroxureela unawuuluma makhalelo Yesu awula makristau oopacera yaathoonyenryaaya wuulalyeerani. Itthu nimpheeleehu khunakhala uhela mmuru citthu ninrweehu wuuluma wuulalyeerani, masi ukhanle waathoonyera nifento atthu ninrweehu waalalyeera. Makhalelo 12 otheene anoolumiya nhina ila ibroxureela ahaana ifayita ukati unrweehu ulalyeera ihapari comaana. Masi, ninaahala woona wiira ahaavo makhalelo ootepa ukhalana ifayita wiira nancere umoopana ntthu mwaha, uturuwela unthotola ni wancera unsomiha Ibiiblya.

Ukati woosoma khula mwaha wo ila ibroxureela, muupuwele mananna nyuuva cinhaleenyu uthoonyera ayo makhalelwaayo ukati woowoopana mwaha atthu o ncoko unlalyeereenyu. Mwiikurumice wuncerera unfenta winyu Yehova ni waafenta winyu atthu. Khiivo-tho ikhalelo ikhwaawe inhala wuukaviherani nyuuva ukhitiri waapanka eetthuci uvikana ufenta.

Hiiva ninoona ukhala iparakha yuulupale uvara nteko nkhayi ni nyuuva. (Sof. 3:9) Ninanlompa Yehova wiira hihiyerere wuucaalihani nlattu wo wiikurumica winyu waafenta atthu ni uvara nteko wowaapanka eetthuci!