Ku Ina na ya Nkazi:

Kutemwa Leza alino na antu kukalenga twauvwila mazwi akuti: “Yangini mukapange antu amu nko zyonsi ukuya asambi, mwayabatizya.” (Mate. 28:19, 20; Mako 12:28-31) Ndi cakuti tuli nu kutemwa kwa cumi tungaazwa yayo akalondesya “ukuya umu nzila ya ku umi wa pe.”—Mili. 13:48

Mpiti twikanga sile mano kuli vino tumaya tukalande nu kukusiila antu impapulo. Lelo ndakai tulinzile ukwika mano kukuzifya imilanzyanyizizye itu. Tukulonda ukulalanga ukuti twatemwa yauze lino tukulanda pa malyasi yano yangatemwa ukuvwa. Cikupiliula ukuti tulinzile ukuiteyanya ukusenuka nu kwika mano kuli vino umuntu angatemwa ukuvwa. Uzye ivyeo ivili mu kabuku kaa vingatwazwa uli ukucita vivyo?

Mu kabuku kaa muli masambililo 12 angatwazwa ukuya ni miyele ingalenga twalanga ukutemwa alino nu kupanga asambi. Cila sambililo muli lyasi lya muli Baibo ilikulanda pa miyele ino Yesu nanti Ina Klistu akutandikilapo yalangizye lino yakuomba umulimo wa kusimikila. Uyo witu, asi ukwika sile amano kuli vino tumalanda, lelo ukulola inzila ino tumalangilamo ukutemwa. Nanti icakuti tulinzile ukukwata imiyele yonsi lino tukuomba umulimo wa kusimikila, tumalanda pali vino imiyele imwi ikalondekwa sana lino tukutandika ukulanzyanya, lino tukuswililako, na lino tukutungulula masambililo ya Baibo.

Lino mu kusambilila mwi sambililo lyonga na lyonga, mwaelenganyapo sana pali vino mungalanga imiyele iyo lino mu kulanzyanya na antu aya uku ncende kuno mukaikala. Mwaombesya pakuti mwatemwa sana Yeova na antu. Nupya ukutemwa kwene kuu ukwacila pa miyele yonsi, kulamwazwa ukufikilizya uyo wa kupanga asambi.

Tukataizya sana pi syuko lino twakwata ilya kuombela pamwi namwe. (Zefa. 3:9) Si Yeova amipaala lino mu kutwalilila ukutemwa antu nu kupanga asambi!