Шергакан иза-ака-влак!

Иеговам да еҥ-влакым йӧратымаш мемнам Иисусын кӱштымашыжым шукташ тарата. Тудо каласен: «Кайыза да чыла калык-влакым туныктыза... нуным тынеш пуртыза» (Матф. 28:19, 20; Мар. 12:28—31). Чын йӧратымаш чот виян. Тудо тыгай еҥын шӱмжым тарватен кертеш, кӧн курымашлык илышыш наҥгайыше чын шинчымашым палымыже шуэш (Ап. паш. 13:48).

Ончыч ме преподнесенийым тунемаш да айдемылан иктаж-могай публикацийым кодаш тыршенна. Но кызыт ме мутланен моштымашнам саемдаш тыршена. Мыланна еҥ-влаклан йӧратымашым ончыкташ кӱлеш да тыгай теме нерген мутланаш, кудыжо нунылан оҥай. Тидлан мыланна лывырге лийман да умылаш тыршыман, мо нерген еҥ-влак шонат да мо нуным тургыжландара. Тыгай моштымаш-влакым саемдаш тиде публикаций полша.

Тиде публикацийыште 12 урок. Кажне урокышто посна койыш нерген ойлалтеш, кудыжо мыланна еҥ-влаклан йӧратымашым ончыкташ да тунемше-влакым ямдылаш полша. Кажне урок Библий гыч ужаш дене негызлалтеш. Тушто палемдыме, кузе Иисус але икымше курымын вес танык-влак иктаж-могай посна койышым ончыктеныт. Мутат уке, чыла койыш-влак служымаште пайдале улыт. Но ме ончалына, кузе южо койыш мыланна полша мутланымашым тӱҥалаш, весыже — мутланымашым умбакыже шуяш, а кумшыжо — шымлымашым эртараш. Мемнан цельна — преподнесенийым шарнен кодаш огыл, а еҥ-влаклан йӧратымашым ончыкташлан йӧным кычалаш.

Кажне койышым шымлыме годым шоналтыза: тендан кундемыштыда еҥ-влак дене мутланыме годым кузе тиде койышым ончыкташ лиеш? Иегова да еҥ-влак деке йӧратымашдам пеҥгыдемдаш тыршыза. Вет мутланен моштымаш огыл, а лачак йӧратымаш тыланда тунемше-влакым ямдылаш полша.

Тиде пашаште тендан дене пырля тыршаш — мыланна кугу чап (Соф. 3:9). Еҥ-влакым умбакыжат йӧратыза да туныктыза. Тек Иегова тыршымашдам суапландара!